The news is by your side.

Advertisement

شاہ رخ خان کی نئی تصویر کی اصل حقیقت کیا ہے؟ جانیے

ممبئی : بھارتی فلم انڈسٹری کے نامور اداکار شاہ رخ خان کی ایک تصویر ان دنوں سوشل میڈیا پر خوب وائرل ہورہی ہے، جسے ان کے مداحوں کی جانب سے خوب پذیرائی بھی مل رہی ہے۔

اس تصویر میں انہیں سفید داڑھی اور لمبے کالے بالوں کے ساتھ دکھایا گیا ہے، شاہ رخ خان کے مداح سوشل میڈیا پر اس تصویر میں نظر آنے والے ان کے اس روپ کو پسند کررہے ہیں۔

اس تصویر کی اصل حقیقت کیا ہے؟ آیئے ہم آپ کو بتاتے ہیں، غیر ملکی خبر رساں ادارے کی رپورٹ کے مطابق  تصویر میں اُنہیں لمبے بالوں، سفید گھنی داڑھی اور سیاہ کوٹ  پینٹ میں ملبوس دکھایا گیا ہے۔

بہت سے صارفین کا خیال تھا کہ یہ شاہ رخ خان کی نئی آنے والی فلم پٹھان سے ان کا نیا روپ ہے لیکن یہ سچ نہیں ہے، حقیقت میں یہ تصویر سال2017 میں ڈبو رتنانی کے ساتھ ان کے پرانے فوٹو شوٹ کی تصویر کا فوٹو شاپ ورژن ہے۔

تاہم مداحوں کو شاہ رخ خان کے لمبے بالوں کا نیا روپ پسند آیا اور انہوں نے اداکار کی تعریف میں محبت بھرے تبصروں کے ساتھ اس تصویر کو خوب شیئر بھی کیا۔

واضح رہے کہ شاہ رخ خان آخری بار فلم زیرو میں انوشکا شرما اور کترینہ کیف کے ساتھ نظر آئے تھے، یہ فلم 2018میں ریلیز ہوئی تھی۔

اب وہ سدھارتھ آنند کی فلم پٹھان میں دیپیکا پڈوکون اور جان ابراہم کے ساتھ نظر آئیں گے لیکن ٹیم نے ابھی تک فلم کا باضابطہ اعلان نہیں کیا ہے۔

دوسری جانب گزشتہ برس اکتوبر میں جب سے ان کے بڑے بیٹے آریان خان کو منشیات کے ایک کیس میں گرفتار کیا تھا تب سے شاہ رخ سوشل میڈیا پر بھی کم متحرک نظر آتے ہیں، آرین کو تقریباً تین ہفتے جیل میں گزارنے کے بعد ضمانت مل گئی تھی۔

Comments

یہ بھی پڑھیں