بالی ووڈ سپر اسٹار شاہ رخ خان کے مداحوں کا طویل انتظار اب ختم ہونے کو ہے، ان کی نئی فلم ‘ڈنکی’ کی پہلی جھلک ریلیز کر دی گئی۔
تقریباً چار سال سے شاہ رخ خان کے مداح جن لمحات کا انتظار کر رہے تھے وہ اب آنے والے ہیں، شاہ رخ نے بڑے پردے پر واپسی کا سوشل میڈیا پر اعلان اپنی نئی فلم کی خوش خبری کے ساتھ کیا ہے۔
اگرچہ فلم ‘پٹھان’ کی تاریخ کا اعلان پہلے ہی کیا جا چکا ہے، تاہم اب ایک ایسی فلم کا اعلان کیا گیا ہے، جو ہندی سینما کو سمجھنے والوں میں سنسنی اور جوش پیدا کر سکتی ہے، وجہ یہ ہے کہ کئی بہترین فلموں کے ہدایت کار راج کمار ہیرانی اور شاہ رخ خان پہلی بار ایک فلم لے کر آ رہے ہیں، جس کا نام ہوگا ’ڈنکی Dunki‘۔
شاہ رخ خان نے ایک ٹویٹ کے ساتھ ایک ویڈیو شیئر کی ہے جس میں وہ راج کمار ہیرانی سے فلم کے بارے میں بات کرتے نظر آ رہے ہیں۔
شاہ رخ نے لکھا ڈیئر راج کمار ہیرانی سر، آپ میرے سانتا کلاز نکلے، آپ شروع کرو میں ٹائم پر پہنچ جاؤں گا۔ بلکہ میں تو سیٹ پر ہی رہنے لگوں گا۔ میں آخر کار آپ کے ساتھ کام کرنے کے لیے پرجوش ہوں۔ میں 22 دسمبر 2023 کو آپ سب کے لیے ڈنکی لے کر آرہا ہوں۔
Dear @RajkumarHirani sir, Aap toh Mere Santa Claus nikle. Aap shuru karo main time pe pahunch jaunga. actually main toh set par hi rehne lagunga. Feeling humbled & excited to finally work with you.Bringing to you all #Dunki in cinemas on 22nd December 2023https://t.co/KIqj8LfJEg
— Shah Rukh Khan (@iamsrk) April 19, 2022
بالی ووڈ کو تھری ایڈیٹس، پی کے، سنجو اور منا بھائی ایم بی بی ایس جیسی سپر ہٹ فلمیں دینے والے راج کمار ہیرانی کی ہدایت کاری میں بنے والی اس فلم ’ڈنکی‘ کی ریلیز کا بھی اعلان کر دیا گیا ہے جو کہ 22 دسمبر 2023 میں نمائش کے لیے پیش کی جائے گی۔
راجو ہیرانی نے بھی ایک ٹوئٹ میں لکھا کہ ’شاہ رخ، ہم نے آخرکار ایک ساتھ فلم بنانے کا فیصلہ کر ہی لیا۔ اگلے سال کرسمس پر آپ سب سے سینما گھروں میں ملیں گے۔‘
.@iamsrk, Aakhir humne ek saath movie banane ka decision le hi liya 😄 Extremely thrilled to announce #Dunki, coming to you next Christmas! Release in cinemas on 22.12.23https://t.co/zb8463stsi @taapsee @gaurikhan @RedChilliesEnt @RHFilmsOfficial
— Rajkumar Hirani (@RajkumarHirani) April 19, 2022
راجو ہیرانی نے اس ٹوئٹ میں تاپسی پنو کو بھی ٹیگ کیا ہے، فلم میں تاپسی پنو اہم کردار میں ہیں، تاپسی نے بھی ٹوئٹ کرتے ہوئے لکھا ’آخر کار یہ ہو رہا ہے، شاہ رخ اور راجو ہیرانی کے ساتھ اپنی اگلی فلم ڈنکی کا اعلان کرتے ہوئے مجھے بہت خوشی ہو رہی ہے۔‘
ڈنکی کی شوٹنگ اس مہینے شروع ہو گئی ہے، جب کہ اگلے شیڈول کی شوٹنگ پنجاب میں ہو رہی ہے، اس فلم کو راجو ہیرانی اور ابھیجیت جوشی نے لکھا ہے۔
یاد رہے کہ شاہ رخ خان کی فلم پٹھان 25 جنوری 2023 کو ریلیز ہوگی جب کہ ان کے مداحوں کو اب ’ڈنکی‘ کا بھی بے صبری سے انتظار ہے۔
