لاہور : ن لیگ کے صدر شہباز شریف کا کہنا ہے کہ اسرائیل جنگی جرائم کا وحشیانہ ارتکاب کر رہا ہے ، فلسطین پرظلم کی بڑھتی آگ نہ رکی تو شعلے پوری دنیا کولپیٹ میں لیں گے۔
تفصیلات کے مطابق ن لیگ کے صدر شہباز شریف کی غزہ کے اسپتال پر اسرائیلی حملے کی شدید مذمت کرتے ہوئے 500سے زائد فلسطینیوں کی شہادت پررنج و غم اور افسوس کا اظہار کیا.
شہبازشریف کا کہنا تھا کہ صیہونی ریاست کے وحشیانہ اقدام کی مذمت کے لئے الفاظ کم پڑ گئے ہیں، اسپتال پروحشیانہ حملےمیں بچوں، عورتوں،ضعیفوں کی شہادتوں پر دکھ ناقابل بیان ہے۔
سابق وزیراعظم نے کہا نہتے بے گناہ فلسطینیوں کے سفاکانہ قتل عام پر خاموشی حوصلہ افزائی کے مترادف ہے ، اسرائیل جنگی جرائم کا وحشیانہ ارتکاب کر رہاہے، فلسطینیوں کی نسل کشی رکوانے کے لئے فوری اقدامات کئے جائیں۔
ان کا کہنا تھا کہ اقوام متحدہ اسرائیل کے خلاف جنگی جرائم کے ارتکاب پر کارروائی کرے اور عالمی برادری، سلامتی کونسل عالمی قوانین پرعمل کرائیں۔
شہبازشریف نے خبردار کیا کہ عالمی قانون کی پامالی دنیا کے امن کو تباہ کر دے گی، ارض فلسطین پرظلم کی بڑھتی آگ نہ رکی تو شعلے پوری دنیا کولپیٹ میں لیں گے۔
ن لیگی صدر نے کہا کہ اسرائیلی مظالم پرانسانیت کاسر شرم،ندامت اور افسوس سے جھک گیا، بیمار ،لاغر بچوں، خواتین اور بیماروں پر بمباری صرف بزدلی ظلم اور بربریت ہے ، اسلامی دنیا متحد ہو کر اس ظلم کو روکنے میں فوری کردار ادا کرے۔
