وزیرِ اعظم آزاد کشمیر کو صدر مسلم لیگ (ن) شہباز شریف کا فون -
The news is by your side.

Advertisement

وزیرِ اعظم آزاد کشمیر کو صدر مسلم لیگ (ن) شہباز شریف کا فون

لاہور: پاکستان مسلم لیگ ن کے صدر میاں شہباز شریف نے وزیرِ اعظم آزاد کشمیر راجہ فاروق حیدر کو فون کرتے ہوئے ان کے ہیلی کاپٹر پر بھارتی فوج کی فائرنگ کی مذمت کی۔

تفصیلات کے مطابق شہباز شریف نے آزاد کشمیر کے وزیرِ اعظم کو فون کر کے بھارتی فوج کی طرف سے ان کے ہیلی کاپٹر پر فائرنگ کے واقعے کی مذمت کی۔

اپوزیشن لیڈر شہباز شریف نے کہا کہ بھارت مقبوضہ کشمیر میں مظالم پر پردہ ڈالنے کے لیے ایسے واقعات کر رہا ہے، ہم مقبوضہ کشمیر کے عوام کے اصولی مؤقف کی ہمیشہ حمایت کرتے رہیں گے۔

سابق وزیرِ اعلیٰ پنجاب کی جانب سے رابطے اور اظہارِ یک جہتی پر آزاد کشمیر کے وزیرِ اعظم راجہ فاروق حیدر نے ان کا شکریہ ادا کیا۔

یاد رہے کہ آج بھارتی فوج نے لائن آف کنٹرول کے قریب وزیرِ اعظم آزاد کشمیر راجہ فاروق حیدر کے ہیلی کاپٹر پر بلا اشتعال فائرنگ کی، بھارتی فوج نے راجہ فاروق کے ہیلی کاپٹر کو اُس وقت نشانہ بنایا جب وہ آزاد کشمیر کے گاؤں تروڑی کے قریب سفر کر رہے تھے۔


یہ بھی پڑھیں:  بھارتی فوج نے ڈرامہ رچایا، ہم اپنی حدود میں تھے، وزیراعظم آزاد کشمیر


بعد ازاں وزیرِ اعظم آزاد کشمیر نے واقعے پر ردِ عمل ظاہر کرتے ہوئے کہا کہ بھارتی فوج نے ڈراما رچایا، ہم اپنی حدود میں تھے، صاف نظر آ رہا ہے بھارت بوکھلایا ہوا ہے۔

انھوں نے بھارتی دعوے کو مسترد کرتے ہوئے کہا کہ وہ وزرا کے ساتھ ہیلی کاپٹر میں اپنی حدود میں تھے، کوئی گن شپ ہیلی کاپٹر نہیں، پرائیویٹ ہیلی کاپٹر تھا۔

Comments

comments

یہ بھی پڑھیں