The news is by your side.

Advertisement

پانامہ لیکس پر 10ارب روپے کی پیشکش ، شہبازشریف نے عمران خان کو لیگل نوٹس بھجوادیا

لاہور : وزیراعلی شہبازشریف نے دس ارب روپے کی پیشکش کے دعوے پرعمران خان کو لیگل نوٹس بھجوادیا،  لیگل نوٹس میں عمران خان سے چودہ روز میں معافی مانگنے کا مطالبہ کیا گیا ہے۔

تفصیلات کے مطابق پانامہ لیکس پر دس ارب روپے رشوت کے بیان پر میاں شہباز شریف کی جانب سے عمران خان کو لیگل نوٹس بھجوا دیا گیا، میاں شہباز شریف کی جانب سے ان کے وکیل خواجہ حارث نے لیگل نوٹس بھجوایا۔ نوٹس بنی گالا اور پی ٹی آئی سیکریٹریٹ کے پتے پر بھجوایا گیا۔

لیگل نوٹس میں کہا گیا ہے کہ عمران خان نے پانامہ لیکس پر دس ارب روپے رشوت کی پیشکش کا بیان دیا جو سراسر جھوٹ ہے۔ عمران خان کا بیان حقیقت پرمبنی نہیں، ان کے بیان سے میاں شہباز شریف اور ان کے خاندان کو ذہنی اذیت کا سامنا کرنا پڑا۔ عمران خان کے بے بنیاد الزام سے ان کی ساکھ بری طرح متاثر ہوئی ہے۔


مزید پڑھیں : شہباز شریف نے عمران خان کے خلاف قانونی چارہ جوئی کا اعلان کردیا


لیگل نوٹس میں تنبیہہ کی گئی ہے کہ عمران خان چودہ روز میں بیان واپس لے کر معافی مانگیں ورنہ قانونی چارہ جوئی کی جائے گی۔

اس سے قبل دس ارب روپے رشوت کے بیان پر وزیراعلیٰ پنجاب شہباز شریف نے عمران خان کو جواب دینے کے بجائے اُن کے خلاف قانونی چارہ جوئی کرنے کا اعلان کیا تھا۔

وزیر اعلیٰ کا کہنا تھا کہ دس ارب روپے کی پیش کش کا الزام ثابت ہو جائے تو قیامت تک معاف نہ کریں، ورنہ عدالت عظمیٰ سے اپیل ہو گی کہ الزام لگانے والے کے خلاف صادق اور امین کا فیصلہ کریں۔


مزید پڑھیں : پاناما معاملے پر خاموش رہنے کے لیے 10 ارب کی پیش کش ہوئی، عمران خان


واضح رہے کہ عمران خان نے الزام عائد کیا تھاکہ انہیں پاناما لیکس کے معاملے پر خاموش ہونے کے لیے 10ارب روپے کی پیشکش کی گئی تھی اور جس شخص نے پیشکش کی  تھی وہ شہباز شریف کا قریبی ساتھی ہے ۔

خیال رہے کہ عمران خان کا کہنا تھا کہ اگر شہباز شریف نے عدالت میں بلایا تو پیشکش کرنےوالا کا نام بتاؤں گا۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Print Friendly, PDF & Email

Comments

comments

یہ بھی پڑھیں