اسلام آباد : آزادی صحافت کے عالمی دن کے موقع پر اسلام آباد میں ہونے والے سیمینار میں ن لیگ کے رہنما جاوید لطیف کو صحافیوں نے گھیر لیا۔
نیشنل پریس کلب اسلام آباد میں شہید صحافی ارشد شریف کی یاد ہونے والے سیمینار میں جاوید لطیف کی آمد پر صحافیوں نے احتجاج کیا، صحافیوں کی جانب سے انتظامیہ سے کہا گیا کہ آپ نے ایسے لوگوں کو سیمینار میں مدعو کیا ہے جو ارشد شریف کے قتل میں سہولت کار تھے۔
مشتعل صحافیوں کے احتجاج کے دوران اسٹیج سے وضاحت کرنے کی بھی کوشش کی جاتی رہی تاہم صحافیوں نے احتجاج جاری رکھا۔ صدر پی ایف یو جے افضل بٹ نے کہا کہ ہم نے جاوید لطیف سے بھی ارشد شریف سے متعلق سوال کیا۔
بعد ازاں ن لیگی رہنما تقریب سے رخصت ہوئے تو صحافیوں نے جاوید لطیف کو باہر گھیر لیا اور سوالات کی بوچھاڑ کردی، ایک صحافی نے سوال کیا کہ آپ کی حکومت میں ارشد شریف پر متعدد مقدمے ہوئے اس پر کیا کہیں گے؟ جاوید لطیف صحافی کو جواب دیئے بغیر گاڑی بھگا کر لے گئے۔