تازہ ترین

سب کھلاڑیوں کو یقین تھا کہ فائنل جیتیں گے، شاہین شاہ

پی ایس ایل 8 کے چیمپئن کپتان شاہین شاہ آفریدی نے کہا ہے کہ ٹیم کے سب کھلاڑیوں کو یقین تھا کہ ہم فائنل میچ جیتیں گے۔

اے آر وائی نیوز کے مطابق گزشتہ شب دفاعی چیمپئن لاہور قلندرز نے قذافی اسٹیڈیم میں کھیلے گئے پی ایس ایل 8 کا فائنل سنسنی خیز مقابلے کے بعد ایک رنز سے جیت کا اپنے اعزاز کا کامیابی سے دفاع کیا اور دوسری بار ٹورنامنٹ کا فاتح بن گیا۔

اس تاریخی فتح کے بعد لاہور قلندرز کے کپتان شاہین شاہ آفریدی نے گفتگو کرتے ہوئے کہا کہ آخری گیند تک ہمت نہیں ہاری کیونکہ سب کھلاڑیوں کو یقین تھا ہم فائنل جیتیں گے۔

شاہین شاہ آفریدی نے مزید کہا کہ یہ جیت والدین کی دعاؤں سے ملی اور اُن ہی کے نام کرتا ہوں۔ شروع میں وکٹ نہیں لے سکا تو یہی کوشش تھی کہ آخر میں وکٹیں لے کر میچ جیتیں۔

قلندرز کے کپتان نے کہا کہ محمد زمان کو بھی کریڈٹ جاتا ہے کہ انہوں نے میچ میں اچھی بولنگ کی جب کہ حارث رؤف دنیا کا بہترین بولر ہے، مجھے اس پر اندھا اعتماد رہتا ہے، اگر اس نے 22 رنز دیے ہیں تو پھر بھی اچھا بولر ہے اور مجھے اس پر اعتماد ہے۔

شاہین آفریدی نے ملتان سلطانز کے کپتان کی تعریف کرتے ہوئے کہا کہ محمد رضوان ایک الگ انسان ہیں، میں انہیں جنتی کہتا ہوں، وہ خاص انسان ہیں اور خاص کام کرتے ہیں۔

Comments

- Advertisement -