The news is by your side.

Advertisement

فاسٹ بولرشاہین شاہ آفریدی کا ہمپشائر کاؤنٹی سے معاہدہ

لندن: پاکستانی نوجوان فاسٹ بولر شاہین شاہ آفریدی نے ٹی ٹوینٹی کے لیے ہمپشائر کاؤنٹی سے معاہدہ کرلیا۔

تفصیلات کے مطابق قومی ٹیم کے نوجوان فاسٹ بولر شاہین شاہ آفریدی نے ٹی 20 بلاسٹ کے 2020 ٹورنامنٹ کے لیے ہمشپائر کاؤنٹی سے معاہدہ کرلیا۔

شاہین شاہ آفریدی ہمپشائر کے اسکواڈ میں شامل ہوں گے اور امکان ہے کہ وہ ٹی ٹوینٹی بلاسٹ کا پورا سیزن کھیلیں گے۔

کاؤنٹی ہمپشائر کے اعلان کے مطابق شاہین شاہ آفریدی کو اگلے سیزن ٹی ٹوینٹی بلاسٹ کے لیے سائن کیا گیا ہے اور وہ پورے ٹورنامنٹ میں کاؤنٹی کو دستیاب ہوں گے جو ان کا پہلا کاؤنٹی سیزن ہوگا۔

شاہین شاہ آفریدی کا کہنا تھا کہ انگلینڈ میں کرکٹ کھیل کر ہمیشہ انجوائے کیا ہے، پہلی مرتبہ کاؤنٹی کرکٹ کھیلنے کا موقع ملنے پر پرجوش ہوں، اس تجربے سے زیادہ سے زیادہ سیکھنے کی کوشش کروں گا اور اپنی ٹیم کو کامیابی دلوانے میں بھی اہم کردار ادا کروں گا۔

ہمپشائر کاؤنٹی کے ڈائریکٹر جائلز وائٹ کا کہنا ہے کہ شاہین شاہ ابھرتا ہوا ٹیلنٹ ہے جس کے پاس پیس اور ورائٹی موجود ہے، وہ مخالف ٹیم کے لیے خطرہ ثابت ہوں گے۔

واضح رہے کہ شاہین شاہ آفریدی گزشتہ 18 ماہ سے قومی ٹیم میں تینوں فارمیٹ کی نمائندگی کررہے ہیں، انہوں نے ورلڈ کپ 2019 کے 6 میچوں میں 14.63 کی اوسط سے 16 وکٹیں حاصل کی تھیں۔

شاہین شاہ آفریدی پاکستان کی جانب سے 19 ایک روزہ میچز میں 40 اور 10 ٹی ٹوینٹی میچز میں 14 وکٹیں حاصل کرچکے ہیں۔

Comments

یہ بھی پڑھیں