The news is by your side.

Advertisement

بھارت درندگی کے ذریعے کشمیریوں کی تحریک آزادی کو نہیں کچل سکتا، شاہی سید

کراچی : عوامی نیشنل پارٹی کے صوبائی صدر شاہی سید نے کہا ہے کہ بھارت درندگی اور تشدد کے ذریعے کشمیریوں کے حق خود ارادیت کی تحریک کو نہیں کچل سکتا۔

یہ بات انہوں نے باچا خان مرکز سے جاری کردہ بیان میں کہی، شاھی سید نے کہا کہ کشمیر میں بے گناہوں کا بہتا خون تمام دنیا خاص طور پر مسلم دنیا کا ضمیر کو جھنجوڑ رہا ہے، مقبوضہ کشمیر کی صورتحال پر اقوام عالم کی چشم پوشی مظلوموں کے علمبرداروں کے لیے لمحہ فکریہ ہے۔

بھارت درندگی اور تشدد کے ذریعے کشمیری عوام کے حق خود ارادیت کی تحریک کو نہیں کچل سکتا، کشمیریوں کو اقوام متحدہ کی قرار دادوں کے مطابق حق خود ارادیت دیا جائے ہم مظلوم کشمیریوں کے ساتھ ہیں۔

ظلم و ستم اور بربریت سے مظلوموں کی تحریکوں زیادہ دیر دبایا نہیں جاسکتا، کشمیر میں جاری مظالم پر عالمی برادری کی مجرمانہ خاموشی ناقابل برداشت ہے۔

اے ین پی سندھ کے صدر نے مذید کہا کہ ہم دنیا بھر میں ہر مظلوم تحریکوں کی حمایت کرتے ہیں،ہم سمجھتے ہیں کہ جنگ یا جنگی جنون کسی مسئلے کا حل نہیں بلکہ مذاکرات سے ہی مسائل کا حل ممکن ہے، مسائل صرف مذاکرات سے ہی حل کئے جا سکتے ہیں تاکہ دونوں اطراف بسنے والوں کیلئے آزاد فضاءقائم کی جا سکے۔

انہوں نے کہا کہ آج پاکستان تاریخ کے اہم موڑ پر ہے، اس نازک وقت میں سیاسی قیادت کو اجتماعی بصیرت اور تدبر سے کام لینا ہوگا، مسئلہ کشمیر دونوں ملکوں کے درمیان تنازعہ کی بنیادی وجہ ہے اور اسے اقوام متحدہ کی قراردادوں کی روشنی میں حل کیا جائے۔

پاکستان نے دہشت گردی کی جنگ میں کئی زخم اپنے سینے پر کھائے۔ضرورت اس امر کی ہے کہ تمام اختلافات بالائے طاق رکھ کر خطے کو جنگ کا ایندھن بننے سے بچانے کیلئے کردار ادا کریں۔

Comments

comments

یہ بھی پڑھیں