قومی کرکٹ ٹیم کے سابق کپتان شاہد آفریدی نے ایشین کرکٹ کونسل (اے سی سی) کے صدر جے شاہ کے پاکستان کی سکیورٹی سے متعلق بیان پر انہیں آئینہ دیکھا دیا۔
ایشیا کپ 2023 دبئی کے بجائے سری لنکا میں کرانے کے معاملے پر اے سی سی کے صدر جے شاہ نے گزشتہ روز بیان دیا تھا کہ سکیورٹی اور معاشی صورتحال کے سبب تمام فل ممبرز، میڈیا رائٹس ہولڈرز اور اسٹیڈیم رائٹس ہولڈرز پورا ٹورنامنٹ پاکستان میں کھیلنے پر ہچکچاہٹ کا مظاہرہ کررہے تھے۔
جے شاہ کا کہنا تھا کہ اے سی سی کے صدر کی حیثیت سے مجھے اس کا مناسب حل نکالنا تھا، پی سی بی کے اے سی سی سے مل کر بنائے جانے والے ہائبرڈ ماڈل کو تسلیم کیا۔
اے سی سی کے صدر کے اس بیان پر شاہد آفریدی نے ایکس پر بیان جاری کیا اور اس میں جے شاہ کو مینشن کیا۔
I came across Mr @JayShah’s statement about security situation in Pakistan. Just to refresh his memory, Pakistan has hosted the following foreign players/teams in the past six years:
2017 – ICC World XI & SL
2018 – WI
2019 – WI (W), BD (W) & SL
2020 – BD, PSL, MCC & Zim
2021 –…— Shahid Afridi (@SAfridiOfficial) September 6, 2023
سابق کپتان نے لکھا جے شاہ کا پاکستان میں سیکیورٹی کی صورتحال سے متعلق بیان دیکھا تو ان کی یادداشت ری فریش کرنے کے لیے بتا دوں کہ پاکستان نے گزشتہ 6 سال میں کئی غیر ملکی ٹیموں اور کھلاڑیوں کی میزبانی کی ہے۔
شاہد آفریدی نے اپنی پوسٹ میں بتایا ہے کہ ان برسوں میں کون کون سی غیر ملکی ٹیمیں پاکستان آ چکی ہیں۔
اختتام پر شاہد آفریدی نے مزید لکھا کہ مسٹر شاہ کوئی شک نہیں کہ پاکستان 2025 کی چیمپئنز ٹرافی میں بھارت کی میزبانی کے لیے بھی تیار ہے۔
