کراچی: سابق قومی کپتان شاہد آفریدی نے کہا ہے کہ کرکٹ ہی پاکستان اور بھارت کے درمیان تعلقات بہتر بنا سکتی ہے، اسپورٹس ڈپلومیسی سے بہتر کوئی چیز نہیں۔
تفصیلات کے مطابق سابق کپتان شاہد آفریدی نے وائس آف امریکا اردو کو انٹریو دیتے ہوئے کرکٹ کے حوالے سے پاک انڈیا تعلقات پر تبصرہ کرتے ہوئے کہا کہ پڑوسیوں کا حق ہے کہ ایک دوسرے کا خیال کریں۔
انھوں نے کہا پاکستان نے ہمیشہ بڑے پن کا مظاہرہ کیا ہے، پاک ٹیم کو ورلڈ کپ کے لیے بھارت بھیجنے کا فیصلہ خوش آئند ہے، یہ کرکٹ ہی ہے جو دونوں ممالک کے تعلقات بہتر بنا سکتی ہے۔
تاہم دوسری جانب گزشتہ روز بھارت کی جانب سے ایک بار پھر ہٹ دھرمی کا مظاہرہ سامنے آیا ہے، بھارت نے ورلڈ کپ میں پاکستان کرکٹ ٹیم کو خصوصی سیکیورٹی دینے سے انکار کر دیا ہے۔
بھارت کا ورلڈ کپ میں پاکستان ٹیم کو خصوصی سیکیورٹی دینے سے انکار
بھارتی وزارت خارجہ کے ترجمان کا کہنا تھا کہ پاکستان کے ساتھ خصوصی برتاؤ نہیں کیا جائے گا، میگا ایونٹ میں پاکستان کو وہی سہولتیں دی جائیں گی جو دوسرے ملکوں کی ٹیموں کو حاصل ہوں گی۔
