کراچی: قومی کرکٹ ٹیم کے سابق کپتان شاہد خان آفریدی نے ورلڈ کپ 2011 میں بھارت کے خلاف سیمی فائنل میں ناکامی کا ذمہ دار مصباح الحق سمیت ٹیم کے بیٹسمینوں کو ٹھہرادیا۔
اے آر وائی نیوز کی رپورٹ کے مطابق قومی ٹیم کے سابق کپتان شاہد آفریدی نے غیرملکی میڈیا سے گفتگو کرتے ہوئے کہا کہ ہم نے جیت کا موقع گنوایا، لوگوں نے مصباح کی اننگز کو سست قرار دیا۔
شاہد آفریدی کا کہنا تھا کہ مصباح الحق کا کھیلنے کا انداز یہی تھا انہیں وکٹ پر سیٹ ہونے میں وقت لگتا تھا۔
بعدازاں شاہد آفریدی نے وضاحت دیتے ہوئے کہا کہ ورلڈ کپ سیمی فائنل میں شکست بیٹنگ میں ناکامی کی وجہ سے ہوئی تھی، مجھ سمیت کوئی کھلاڑی ہدف کا تعاقب نہ کرسکا، کسی فرد پر کوئی الزام نہیں لگایا ہے۔
Unfortunately I have been misquoted in this interview. The 2011 defeat was due to batting failure of the team. The batsmen including myself didn’t sustain pressure of the chase. No blame on any individual! pic.twitter.com/pgZFrnSWfH
— Shahid Afridi (@SAfridiOfficial) September 29, 2020
شاہد آفریدی کا کہنا تھا کہ ہم واقعی ورلڈ کپ جیتنے کے قریب پہنچ گئے تھے، بطور کپتان میچ ہارنے پر افسوس ہوا، ورلڈ کپ میں طویل عرصے بعد پاکستان کی یہ بہترین کارکردگی تھی۔
سابق کپتان کا کہنا تھا کہ پاکستان میں امن و امان کی صورت حال اب بہتر ہے، بین الاقوامی ٹیموں کو پاکستان کا دورہ کرنا چاہئے، پاکستانی شائقین کرکٹ سے محبت کرتے ہیں۔
شاہد آفریدی کا کہنا تھا کہ وہ کرس گیل سمیت دیگر کھلاڑیوں کو پاکستان میں کھیلنے کے لیے راضی کریں گے اور ان سے ذاتی طور پر بات کریں گے۔
یاد رہے کہ پاکستان ورلڈ کپ 2011 کا سیمی فائنل بھارت سے 29 رنز سے ہار گیا تھا، مصباح الحق نے میچ میں 76 گیندوں پر 56 رنز کی اننگز کھیلی تھی۔