The news is by your side.

Advertisement

شاہ زیب قتل کیس، ملزم شاہ رخ کی نجی اسپتال منتقلی سے محکمہ صحت لاعلم

 شاہ زیب قتل کیس کے  مرکزی ملزم شاہ رخ کو کراچی سینٹرل جیل سے بنگلے میں بنے ایک نجی اسپتال میں منتقل کرنے سے قبل محکمہ صحت سے رابطہ نہیں کیا گیا۔

شاہ رخ کی نجی اسپتال منتقلی کے حوالے سے محکمہ صحت لاعلم ہے، ذرائع کا کہنا ہے کہ اس حوالے سے محکمہ صحت کو جیل یا محکمہ داخلہ کی جانب سے کوئی خط نہیں ملا اور ملزم کو میڈیکل بورڈ کی سفارش کے بغیر ہی نجی اسپتال منتقل کیا گیا۔

ذرائع کے مطابق قیدی کی زندگی اگر خطرے میں ہو تو اسے اسپتال منتقل کیا جاتا ہے اور نجی اسپتال منتقلی کے لیے محکمہ داخلہ محکمہ صحت سے رجوع کرکے میڈیکل بورڈ بنانے کی درخواست کرتا ہے۔

تاہم شاہ رخ جتوئی کے معاملے میں ایسا کچھ نہیں کیا گیا، ذرائع کا کہنا ہے کہ ملزم کو گزری کے جس نجی اسپتال میں منتقل کیا گیا ہے وہ نیب اور اینٹی کرپشن کے قیدیوں کے لیے سہولت گاہ ہے۔

ذرائع کا کہنا ہے کہ جس بنگلے میں قائم اسپتال میں شاہ رخ جتوئی کو منتقل کیا گیا ہے اس کی بنیاد ملزم کے والد نے رکھی تھی جب کہ ملزم کو وہاں زندگی کی تمام سہولیات فراہم کی جارہی ہیں۔

دوسری جانب شاہ رخ جتوئی کی نجی اسپتال منتقلی سے متعلق خبر پر جیل میں ہلچل مچ گئی ہے، سینٹرل جیل حکام اس معاملے پر جواب دینے کو تیار نہیں ہیں اور آئی جی جیل خانہ جات اور جیل سپرنٹنڈنٹ نے اپنے رابطہ نمبرز بند کردیے ہیں۔

Comments

یہ بھی پڑھیں