اسپاٹ فکسنگ اسکینڈل، پی سی بی نے شاہ زیب حسن کو چارج شیٹ جاری کر دی -
The news is by your side.

Advertisement

اسپاٹ فکسنگ اسکینڈل، پی سی بی نے شاہ زیب حسن کو چارج شیٹ جاری کر دی

لاہور: اسپاٹ فکسنگ اسکینڈل میں پی سی بی نے شاہ زیب حسن کو معطل کر کے چارج شیٹ جاری کر دی ہے۔

تفصیلات کے مطابق شاہ زیب آج تیسری مرتبہ اینٹی کرپشن یونٹ کے سامنے پیش ہوئے، پی سی بی نے شاہ زیب کا مؤقف سننے کے بعد شاہ زیب حسن کو معطل کردیا اور چارج شیٹ جاری کر دی ہے جبکہ شاہ زیب حسن کو جواب دینے کے لئے 14روز کی مہلت دی گئی ہے۔

شاہ زیب پر بکیز سے رابطے کی معلومات دیرسے دینے کا الزام ہے۔

ذرائع کے مطابق چارج شیٹ میں ان کے خلاف 3 شقوں کی خلاف ورزی سامنے آئی ہے اور ان پر الزام عائد کیا گیا ہے کہ انہوں نے دوسرے کھلاڑیوں کو فکسنگ پر اکسایا۔ بکیز نے ان کے ساتھ رابطہ کیا تو انہوں نے پی سی بی کو مطلع کرنے کے بجائے تاخیری حربے استعمال کئے۔

خیال رہے کہ چیئرمین پی سی بی شہریار خان پہلے ہی واضح کرچکے ہیں کہ فکسنگ میں ملوث کھلاڑیوں کو کوئی رعایت نہیں ملے گی، جس کھلاڑی نے کرپشن کی وہ کیرئیر ختم سمجھے۔


مزید پڑھیں : اسپاٹ فکسنگ کیس: پی سی بی نے محمد عرفان کو معطل کر دیا


چند روز قبل پاکستان کرکٹ بورڈ نے اسپاٹ فکسنگ کے جرم میں فاسٹ بولر محمد عرفان کو معطل کردیا تھا، محمد عرفان نے پی سی بی اینٹی کرپشن یونٹ کو بیان ریکارڈ کرواتے ہوئے بکیز سے رابطوں کا اعتراف کیا تھا۔

یاد رہے کہ اس سے قبل شرجیل خان، خالد لطیف، محمد عرفان اور ناصر جمشید کو بھی معطل کر کے انہیں شوکاز نوٹس جاری کرچکی ہیں،اسپاٹ فکسنگ اسکینڈل میں معطل کھلاڑیوں کی تعداد 5 ہوگئی ہے۔

واضح رہے کہ پی سی بی نے پی ایس ایل کی ٹیم اسلام آباد یوئانیٹڈ کے دو کھلاڑیوں شرجیل خان اور خالد لطیف کو اسپاٹ فکسنگ کے الزام میں معطل کرتے ہوئے ایونٹ سے باہر کردیا تھا، کھلاڑیوں نے اعتراف جرم بھی کرلیا جس کے بعد انہیں دبئی سے کراچی واپس بھیج دیا گیا تھا۔

Comments

comments

یہ بھی پڑھیں