راولپنڈی : پاکستان عوامی لیگ کے سربراہ شیخ رشید احمد نے کہا ہے کہ عمران خان نے اعلان کرکے ایک ایسا کارڈ کھیلا ہے جس سے پی ڈی ایم کا سیاسی قبرستان بنے گا۔
یہ بات انہوں نے اے آر وائی نیوز سے خصوصی گفتگو کرتے ہوئے کہی، انہوں نے کہا کہ کوئی تاریخ پر تاریخ نہیں ہے، ماہ رمضان کے باعث فیصلہ کیا گیا، اے آر وائی کو کریڈٹ دیتا ہوں کہ5 دن پہلے بتا دیا تھا کہ23تاریخ کو اسمبلیاں تحلیل ہوں گی۔
شیخ رشید کا کہنا تھا کہ مجھے امید ہے عدالت سے نیب ترامیم کے خلاف فیصلہ آئے گا، انہوں نے کہا کہ عمران خان گزشتہ ایک ماہ سے الیکشن امیدواروں کی لسٹ بنا رہا تھا، کئی وزراء نے کہا کہ پرویز الٰہی عمران خان کی بات نہیں مانیں گے۔
عوامی لیگ کے سربراہ نے کہا کہ اب بھی حکومت کے پاس5دن ہیں کہ وہ عام انتخابات کا اعلان کرے، جہاں ق لیگ کہے گی ہم ان کے امیدوار کی حمایت کریں گے، ق لیگ عمران خان کے ساتھ ہے، نشستوں کا کوئی مسئلہ نہیں ہوگا، جس طرح میری عوامی مسلم لیگ ہے اسی طرح ق لیگ بھی پی ٹی آئی کے ساتھ ہے۔
