rasheed نوازشریف کی تقریر سے زیادہ توہین عدالت نہیں ہوسکتی، شیخ رشید
The news is by your side.

Advertisement

نوازشریف کی تقریرسے زیادہ توہین عدالت نہیں ہوسکتی، شیخ رشید

ملتان : عوامی مسلم لیگ کے سربراہ شیخ رشید احمد نے کہا ہے کہ نواز شریف نے آج انتہا کردی، ان کی تقریرسے زیادہ توہین عدالت نہیں ہوسکتی، عدلیہ کے خلاف آج شیم شیم کے نعرے لگوائے گئے، حدیبیہ کیس تیار کرلیا ہے۔

ان خیالات کا اظہارانہوں نے ملتان میں پریس کانفرنس سے خطاب کرتے ہوئے کیا، انہوں نے کہا کہ نوازشریف کو جسٹس ثاقب نثار اور جسٹس کھوسہ پسند نہیں، انہیں صرف ملک قیوم جیسے لوگ پسند ہیں۔

عدالت نے نواز شریف کو 19 کمپنیز کا کیس لڑنے کا موقع دیا، وہ سمجھتے تھے کہ انہیں قطری خط بچالے گا، شریف برادران نے پیسے دے کر عدالتوں پرحملے کرائے، وہ پاکستان میں ڈبہ فلم چلانا چاہتے ہیں۔

نوازشریف یہی چاہتے ہیں ملک جمہوریت ختم ہوجائے، نوازشریف چاہتے ہیں کہ دو سال کیلئے فوج آجائے اور مجھے سزا نہ ہو، یہ ایجنٹ کا کردار ادا کر رہے ہیں۔

شیخ رشید نے وزیراعلیٰ پنجاب کو مخاطب کرتے ہوئے کہا کہ شہباز شریف آپ اپنا فیصلہ خود کریں، نواز شریف آپ کو وزیراعظم کبھی نہیں بننےدےگا، آپ کے ہاتھوں میں وزیراعظم بننے کی لکیر ہی نہیں ہے، نواز شریف شہباز شریف کے بچوں کو بھی سامنے نہیں آنے دیں گے، حدیبیہ کیس تیار کرلیا ہے، کل کے جلسےمیں اعلان کروں گا۔

انہوں نے کہا کہ نوازشریف کی سازش کوناکام بنانا قومی ذمہ داری ہے، ان کی آج کی تقریر کے بعد خطرات بڑھ گئے ہیں، مجھے2018میں الیکشن نظرنہیں آرہے، نوازشریف عدلیہ کو للکار کر جمہوریت کی خدمت نہیں کررہے، ان کو مشورہ دینے کیلئے مریم بی بی کافی ہیں، مریم بی بی کے مشوروں سے ہی نوازشریف یہاں تک پہنچ گئے۔

ایک سوال کے جواب میں شیخ رشید کا کہنا تھا کہ نوازشریف نے آج تک بھارتی دہشت گرد کلبھوشن کا نام نہیں لیا،
انہوں نے کلبھوشن کا کیس ٹھیک طریقے سے نہیں لڑنے دیا۔

انہوں نے کہا کہ پنجاب میں اگلا مقابلہ پی ٹی آئی اور ن لیگ میں ہوگا، سندھ میں پیپلزپارٹی کی پوزیشن بہترہے، طاہرالقادری کا نام ای سی ایل میں آنے سے پہلے نواز شریف کا نام ڈال دیا جائے گا۔

Comments

comments

یہ بھی پڑھیں