سلہٹ(20 مئی 2026): پاکستان ٹیسٹ کرکٹ ٹیم کے کپتان شان مسعود کا بنگلا دیش کے خلاف ٹیسٹ سیریز میں کلین سوئپ شکست پر ردعمل آگیا۔
میچ کے اختتام پر گفتگو کرتے ہوئے شان مسعود نے ٹیم کی مجموعی کارکردگی کا جائزہ لیا۔ انہوں نے ان اہم لمحات کی نشاندہی کی جہاں ٹیم مضبوط پوزیشن میں ہونے کے باوجود میچ پر گرفت برقرار رکھنے میں ناکام رہی۔
ٹیسٹ کپتان نے تسلیم کیا کہ اہم مواقع پر بیٹرز کا اپنی اننگز کو بڑے اسکور میں تبدیل نہ کر پانا اور بولرز کا نظم و ضبط برقرار نہ رکھنا شکست کی بڑی وجوہات بنا۔
شان مسعود نے کہا میچ کے حوالے سے میری رائے یہ ہے کہ ہم سے بہت سی غلطیاں ہوئیں۔ جب آپ چوتھی اننگز میں 360 کے قریب رنز بناتے ہیں تو آپ میچ جیتنے کی توقع کرتے ہیں، لیکن میرا خیال ہے کہ پہلی تین اننگز میں ہمارے پاس غور کرنے کے لیے بہت کچھ تھا۔
پاکستانی کپتان نے ان اہم موڑ کا بھی ذکر کیا جہاں بنگلہ دیشی ٹیم دباؤ میں تھی لیکن پاکستان فائدہ نہ اٹھا سکا۔ انہوں نے کہا پہلی اننگز میں بنگلا دیش کی 46 رنز کی برتری ہمیں نقصان پہنچا گئی۔ جب ان کے 116 رنز پر 6 کھلاڑی آؤٹ ہو چکے تھے، تو ان کی آخری 4 وکٹوں نے بہت زیادہ رنز بنا دیے۔
"اسی طرح جب ہم بیٹنگ میں 142 رنز پر 4 وکٹیں گنوا چکے تھے، تو کریز پر موجود سیٹ بیٹرز کو بڑی اننگز کھیلنی چاہیے تھی۔ ہم نے پہلی تین اننگز میں چیزوں کو ٹھیک سے نہیں سنبھالا، یہی وجہ ہے کہ چوتھے اور پانچویں دن کی محنت جیت میں تبدیل نہ ہو سکی”
شان مسعود نے ٹیسٹ کرکٹ کی سخت طبیعت پر زور دیتے ہوئے کہا کہ اگر پاکستان کو اعلیٰ سطح پر مقابلہ کرنا ہے تو کارکردگی میں تسلسل لانا ہوگا۔
انہوں نے کہا "ٹیسٹ کرکٹ میں آپ کو ہر غلطی کی سزا ملتی ہے، یہ فارمیٹ کسی کو معاف نہیں کرتا۔ یہاں ہمیشہ بہترین کھلاڑی ہی مقابلہ کرتے ہیں۔ آپ کو کوئی بھی میچ آسانی سے نہیں ملتا، بلکہ نتائج حاصل کرنے کے لیے کڑی محنت کرنی پڑتی ہے، اور بطور ٹیم ہمیں یہی کرنے کی ضرورت ہے۔
انہوں نے مزید کہا کہ پاکستان اکثر میچ جیتنے کی پوزیشن میں آ جاتا ہے لیکن کھیل کا اختتام اچھے انداز میں نہیں کر پاتا۔
ان کا کہنا تھا ہم خود کو اچھی پوزیشن میں تو لے آتے ہیں، میرے خیال میں صرف چند ہی ایسے ٹیسٹ میچز ہوں گے جہاں حریف ٹیم نے ہمیں مکمل طور پر آؤٹ کلاس کیا ہو، ورنہ باقی تمام میچوں میں ہم اچھی پوزیشن میں تھے لیکن ہم میچ کا اختتام اچھے طریقے سے نہیں کر سکے۔
واضح رہے کہ میچ میں بنگلا دیش کی جانب سے دیے گئے 437 رنز کے بڑے ہدف کے تعاقب میں پاکستانی ٹیم چوتھی اننگز میں 97.2 اوورز میں 358 رنز بنا کر آؤٹ ہو گئی۔ بنگلا دیش کی جیت میں اسپنر تاج الاسلام نے میچ وننگ اسپیل کر کے فیصلہ کن کردار ادا کیا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں