The news is by your side.

Advertisement

سیف علی خان پاکستان کے بجائےبھارتی دہشت گردوں کی فکر کریں: شان

پاکستان کے نامور فلمی اداکار شان شاہد نے سیف علی خان کے پاکستان مخالف نظریات کا کھل کر جواب دیا ہے۔

شان شاہد عمومی طور پر فلموں میں غصیلے کردار کرنے کے سبب مشہور ہیں لیکن اس بار ان کا یہ غصہ حقیقی زندگی میں بھی دیکھنے میں آیا ہے۔

پاکستانی اداکار شان کئی ایکشن فلموں میں کام کرچکے ہیں جن میں وہ تنِ تنہا عسکریت پسند دہشت گردوں سے نبرد آزما دکھائی دیتے ہیں جیسے کہ انکی سپر ہٹ فلم ’وار‘اور تکمیل کے مراحل میں موجود فلم ’یلغار‘۔ انہوں نے سیف علی خان کے پاکستان سےتعصب پر مبنی بیان پر سخت تنقید کرتے ہوئے انہیں ان کے مضحکہ خیز الزامات کا انتہائی مناسب جواب بھی دیا ہے۔

فلم ’’فینٹم‘‘ میں ایک جگہ سیف علی خان انتہائی جوش میں کہتے ہیں کہ ’’اگر امریکہ پاکستان میں داخل ہوکر اسامہ کو اپنا نشانہ بنا سکتا ہے تو ہم ایسا کیوں نہیں کرسکتے؟‘‘۔

لاہورہائی کورٹ میں حافظ سعید کی جانب سے دائرکردہ درخواست پر فلم ’فینٹم‘ کی نمائش پر پابندی عائد کردی گئی ہے جس کے ردعمل میں سیف علی خان کا کہنا تھا کہ ’’انہیں پاکستان پر اعتماد نہیں رہا‘‘۔ انہوں نے مزید کہا کہ ’’انہیں اس بات پرحیرت ہوتی ہے کہ پاکستان میں حافظ سعید جیسا شخص بھی عدالتوں تک رسائی رکھتا ہے‘‘۔

شان نے سیف علی خان کے اس بیان کا جواب اپنے فیس بک اکاؤنٹ پر دیا جس میں انہوں نے تنبیہہ کی کہ ’’پاکستان کی طرف میلی آنکھ سے دیکھنے والے کو خطرناک نتائج کے لئے تیار رہنا چاہیئے‘‘۔

انہوں نے مزید کہا کہ’’اعتماد کسی ملک سے نہیں ملتا بلکہ اپنے اندر سے آتا ہے اور آپ ( سیف علی خان) اپنی 4 ناکام فلموں کے بعد خود پر سے اعتماد کھو بیٹھے ہیں‘‘۔

شان نے اپنے فیس بک پیغام میں مزید کہا کہ ’’سیف کو پاکستان میں ولن ڈھونڈنے کی ضرورت نہیں ہے ان کے اپنے ملک میں دہشت گرد خاطر خواہ تعداد میں موجود ہیں وہ بھی سرکاری پروٹوکول کے ساتھ‘‘۔

شان نے سیف علی خان کی مزید دھجیاں بکھیرتے ہوئے کہاکہ ’’ اپنے خانوں سے کہوکہ بھارت کی فکر کریں اور پاکستان کے بارے میں سوچنا چھوڑدیں، اس کی حفاظت نہ صرف یہ کہ خان کرتے ہیں بلکہ وہ تمام سماجی اکائیاں جو پاکستان میں ہیں سب کی سب پاکستان کی حفاظت کے لئے سرگرم ہیں۔ ہاں بھارت میں مسلمانوں کی حفاظت کے لئے کسی مارٹن لوتھر کنگ کی ضرورت ہے‘‘۔

اس سے قبل شان کے ساتھی فلمی اداکار حمزہ علی عباسی بھی سیف علی خان کو پاکستان کے بارے میں متنازعہ اور مضحکہ خیز بیانات دینے پر تنقید کا نشانہ بنا چکے ہیں۔

Comments

comments

یہ بھی پڑھیں