پشاور: افغانی خاتون شربت گلہ کو واپس بھیجنے کی تیاری مکلم کرلی گئی، مذکورہ خاتون کی سزا کل بدھ کو پوری ہورہی ہے۔
تفصیلات کے مطابق صوبائی محکمہ داخلہ خیبر پختونخوا کی جانب سے شربت گلہ کی افغانستان واپسی کی درخواست منظور کرتے ہوئے انہیں وطن واپس روانہ کرنے کی تیاریاں کر لی گئیں۔
شربت گلہ کی درخواست پر ان کو علاج کے لیے اسپتال منتقل کیا گیا تھا، ان کی سزا کل نو نومبر بروز بدھ کو پوری ہورہی ہے جس کے بعد انہیں افغانستان بھیج دیا جائے گا۔
یاد رہے کہ افغانستان نے افغان خاتون شربت گلہ کی گرفتاری پر تشویش کا اظہار کرتے ہوئے معاملہ پاکستانی حکومت کے ساتھ اٹھانے کا فیصلہ کیا تھا۔
واضح رہے کہ 26 اکتوبر کو پشاور کے علاقے نوتھیہ میں ایف آئی اے نے کارروائی کرکے شربت بی بی کو گرفتار کیا تھا، جس پر غیر قانونی طریقے سے پاکستانی شناختی کارڈ بنانے کا الزام ہے۔
مزید پڑھیں : شربت گلہ بی بی نے پاکستان میں رہنے سے انکارکردیا
ایف آئی اے کے مطابق شربت بی بی نے اپنی دو بیٹیوں کے بھی جعلی شناختی کارڈ بنوائے تھے۔ پشاورکی مقامی عدالت نے افغان خاتون شربت گلہ بی بی کو پندرہ دن قید اورایک لاکھ دس ہزارروپے جرمانے کی سزا سنائی تھی اور سزا مکمل ہوتے ہی پاکستان بھی چھوڑنے کا بھی حکم دیا۔
مزید پڑھیں : پشاور: سبزآنکھوں والی افغان خاتون شربت بی بی گرفتار
سبز آنکھوں سے شہرت پانے والی شربت گلہ کا تعلق افغانستان سے ہے ،جو افغان جنگ کے بعدانیس سو چوراسی میں اپنے خاندان کے ساتھ پاکستان آگئی تھی۔
