لاہور: جیل میں قید کاٹنے والے سابق وزیرِ اعظم نواز شریف، ان کی صاحب زادی مریم اور داماد کیپٹن (ر) صفدر کی پیرول پر رہائی میں توسیع کرتے ہوئے مدت پانچ دن کر دی گئی ہے۔
تفصیلات کے مطابق پنجاب کے محکمۂ داخلہ نے نواز شریف اور ان کی صاحب زادی کی پانچ دن پیرول پر رہائی کے لیے جاری کی جانے والی سمری پر دستخط کر دیے۔
سابق وزیرِ اعظم کی پیرول پر رہائی کے سلسلے میں 5 دن کی توسیع بیگم کلثوم نواز کی آخری رسومات میں شرکت کے لیے کی گئی ہے۔
نواز شریف، مریم نواز اور کیپٹن صفدر کی پیرول پر رہائی کا معاملہ دیکھتے ہوئے وزرا نے بھی 5 دن کی توسیع کی منظوری دینے کی اجازت دے دی ہے۔
محکمۂ داخلہ پنجاب کی منظور کردہ سمری کی کاپی اے آر وائی نیوز نے حاصل کر لی، سیکریٹری داخلہ نسیم نواز کی بھجوائی گئی سمری وزیرِ اعلیٰ پنجاب نے بھی منظور کر لی ہے۔
خیال رہے کہ اس سے قبل پنجاب حکومت کی جانب سے اڈیالہ جیل کے تینوں قیدیوں کو 12 گھنٹے کے لیے پیرول پر رہا کیا گیا جس کے بعد وہ جاتی امرا پہنچے، تاہم پیرول کی مدت میں توسیع کرتے ہوئے اسے تین دن کیا گیا۔
نواز شریف تعزیت کے لیے آنے والوں سے نہیں مل سکیں گے
اب پیرول کی مدت میں مزید توسیع کرتے ہوئے اسے پانچ دن کر دیا گیا ہے، پنجاب حکومت کی جانب سے قوانین کو نرم کرتے ہوئے پیرول پر رہا کرنے کی منظوری دی گئی۔
واضح رہے کہ سابق خاتونِ اوّل بیگم کلثوم نواز طویل علالت کے بعد گزشتہ روز لندن میں کینسر کے عارضے کے باعث انتقال کر گئی ہیں، ان کا جسدِ خاکی لانے کے لیے شہباز شریف لندن جا چکے ہیں۔
