اسلام آباد: شریف خاندان کے نام ایگزٹ کنٹرول لسٹ میں ڈالنے کے معاملے پر نیب نے اپنا جواب وزارت داخلہ کو پیش کردیا۔ وزیر داخلہ احسن اقبال فائل دیکھ کر برہم ہوگئے۔
تفصیلات کے مطابق قومی احتساب بیورو (نیب) ذرائع کا کہنا ہے کہ شریف خاندان کے نام ایگزٹ کنٹرول لسٹ میں ڈالنے سے متعلق وزارت داخلہ کو جواب پیش کردیا گیا ہے۔
ان کے مطابق مذکورہ معاملے کے لیے وزارت داخلہ نے نیب کو خط لکھا تھا جس کا نیب نے جواب دے دیا۔ وزارت داخلہ نے جو چیزیں مانگی تھیں وہ نیب کی جانب سے فراہم کردی گئیں جس کے بعد وزارت داخلہ نے فائل تیار کر کے وزیر داخلہ کو پیش کردی۔
تاہم وزیر داخلہ احسن اقبال شریف خاندان سے متعلق فائل پیش کرنے پر سخت برہم ہوئے۔
ذرائع کے مطابق وزیر داخلہ نے حکم دیا کہ فائل کو میری میز سے ہٹا دیا جائے۔
یاد رہے کہ نیب نے سابق وزیر اعظم نواز شریف، ان کی صاحبزادی مریم نواز اور داماد کیپٹن ریٹائرڈ صفدر کے نام ایگزٹ کنٹرول لسٹ میں ڈالنے کی سفارش کی تھی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
