شارجہ : پولیس نے ایشیائی شہریوں کو پنجرے میں بند کرکے زبردستی اماراتی فٹبال ٹیم کی حمایت کروانے والے متعدد افراد کو گرفتار کرلیا۔
تفصیلات کے مطابق متحدہ عرب امارات کی ریاست شارجہ میں جمعرات کے روز سوشل میڈیا پر ایک ویڈیو وائرل ہوئی تھی جو فٹبال کے مداحوں کی ناقابل بردادشت جنونیت کی واضح تصویر تھی۔
اماراتی میڈیا کا کہنا ہے کہ پولیس نے ویڈیو کے معاملے پر کچھ افراد کو گرفتار کیا ہے جو متاثرہ افراد کو پنجرے میں بند کرکے اے ایف سی ایشین کپ کے دوران بھارت اور متحدہ عرب امارات کے درمیان کھیلے جانے والے میچ میں اماراتی فٹبال ٹیم کی حمایت کرنے کا کہہ رہے تھے۔
🔻دولـة الامارات العربية المتحدة
النائب العام للدولة: تم اتخاذ الإجراءات القانونية ضد صاحب فيديو حبس أشخاص من الجنسية الآسيوية داخل قفص طيور ليدفعهم لتشجيع المنتخب الإماراتي وعرضه على النيابة المختصة باعتبار أن هذا المسلك جريمة معاقب عليها قانونا ولايعبر عن قيم التسامح فالإمارات pic.twitter.com/twUlfbsXaQ— فاطمة الحبسي (@AlhabsiFatma) January 11, 2019
متحدہ عرب امارات کے اٹارنی جنرل کا کہنا ہے کہ یو اے ای فٹبال ٹیم کے حامیوں کی جانب سے ایسے اقدامات ناقابل معافی اور امارات کی اقدار کے خلاف ہیں، ایشیائی شہریوں کو پنجرے میں بند کرنے والے افراد کے خلاف سخت قانونی کارروائی کی جائے گی۔
مقامی خبر رساں ادارے کا کہنا ہے کہ پولیس کی جانب سے کتنے افراد گرفتار کیے گئے ہیں ان کی تعداد واضح نہیں کی گئی۔
شارجہ پولیس کا کہنا ہے کہ ذمہ داروں کو مزید تفتیش اور کارروائی کےلیے پبلک پراسیکیوشن کے پاس بھیجا جائے گا، سوشل میڈیا پر وائرل ہونے والی ویڈیو متحدہ عرب امارات کے رسم و رواج کے برعکس ہے۔
مقامی خبر رساں ادارے کا کہنا ہےکہ پنجرے میں قید کیے گئے افراد بھارتی فٹبال ٹیم کے سپوٹرز تھے جن سے زبردستی یو اے ای فٹبال ٹیم کی حمایت کروائی جارہی تھی۔
اماراتی خبر رساں ادارے کا کہنا ہے کہ گرفتار افراد کو چھ ماہ سے 10 برس قید اور 50 ہزار سے 20 لاکھ درہم جرمانے کی سزا ہوسکتی ہے۔
متحدہ عرب امارات کے حکام کی جانب سے شہریوں کو مشورہ دیا گیا ہے کہ سوشل میڈیا کا غلط استعمال نہ کریں اور مذاق میں بھی ایسی ویڈیو یا تصاویر سوشل میڈیا پر شیئر نہ کریں جو یو اے ای قوانین کے خلاف ہوں۔
