کراچی : سندھ ہائیکورٹ نے شرجیل میمن کی ضمانت میں توسیع کی درخواست مسترد کردی، عدالت کا کہنا ہے کہ سابق صوبائی وزیر نے عدالتی نظام کا ناجائز فائدہ اٹھایا۔
تفصیلات کے مطابق سندھ ہائیکورٹ میں سابق صوبائی وزیر شرجیل میمن کیخلاف کرپشن اور زمینوں کی غیرقانونی الاٹمنٹ کیس میں درخواست ضمانت کی سماعت ہوئی۔
اس موقع پر شرجیل میمن کے وکیل نے 26 فروری تک ضمانت میں توسیع کی درخواست کی اورکہا کہ میرے مؤکل دبئی کے اسپتال میں زیرعلاج تھے، پیر تک پاکستان پہنچ جائیں گے، شرجیل میمن کا 27 فروری کا وطن واپسی کا ٹکٹ پیش کیا گیا جسے سختی سے مسترد کر دیا گیا۔
سندھ ہائیکورٹ نے کے جج نے اپنے فیصلے میں لکھا ہے کہ شرجیل میمن کی ضمانت میں مزید توسیع دینا عدالت سے مذاق کے مترادف ہے، شرجیل میمن نے بار بار ضمانت میں توسیع لی۔
مزید پڑھیں: شرجیل میمن پیر تک پاکستان پہنچ جائیں گے‘ وکیل فیض شاہ
عددالت کا اپنے فیصلے میں کہنا ہے کہانہوں نے عدالتی نظام کا ناجائز فائد ہ اٹھایا، ایسی صورتحال میں شرجیل میمن کی ضمانت میں دوبارہ توسیع نہیں دے سکتے۔
واضح رہے کہ سابق صوبائی وزیر اطلاعات ونشریات سندھ شرجیل میمن پر کرپشن، زمینوں کی غیرقانونی الاٹمنٹ کے الزامات ہیں۔
