The news is by your side.

Advertisement

چھکے چوکوں کی برسات: شرجیل خان نے ڈبل سنچری بنا ڈالی

ہاؤس آف ناردرن اسلام آباد میں کھیلے گئے میچ میں شرجیل خان کی شاندار ڈبل سنچری کی بدولت سندھ نے خیبرپختونخوا کو 29 رنز سے شکست دے دی۔

اوپنر نے 136 گیندوں پر 19 چوکوں اور 14 چھکوں کی بدولت 206رنز کی دھواں دھار اننگز کھیلی۔ سندھ نے پہلے بیٹنگ کرتے ہوئے مقررہ 50 اوورز میں 6 وکٹوں گنوا کر 374 رنز بنائے۔ عمیر بن یوسف نے 40 رنز اسکور کیے۔ محمد وسیم جونیئر نے دو وکٹیں حاصل کیں۔ جواب میں خیبرپختونخوا کی پوری ٹیم 47 اوورز میں 345 رنز بناکر آؤٹ ہوگئی۔

Image

محمد سرور، عادل امین اور کامران غلام کی نصف سنچریاں رائیگاں گئیں۔ محمد سرور نے 63 گیندوں پر 8 چوکوں اور 5 چھکوں کی مدد سے 89 جبکہ عادل امین نے ایک چھکے اور 8 چوکوں کی بدولت 75 رنز کی اننگز کھیلی۔ کامران غلام 55 رنز بناکر آؤٹ ہوئے۔شاہنواز دھانی نے 64 رنز کے عوض 5 کھلاڑیوں کو آؤٹ کیا۔

Image

اقبال اسٹیڈیم فیصل آباد میں کھیلے گئے میچ میں سینٹرل پنجاب نے ناردرن کو 66 رنز سے ہرادیا۔240 رنز کے تعاقب میں ناردرن کی پوری ٹیم 39.2 اوورز میں 173 رنز پر آؤٹ ہوگئی۔ عماد وسیم 47 رنز بناکر نمایاں رہے۔ وہاب ریاض نے 22 رنز کے عوض 4 کھلاڑیوں کو پویلین کی راہ دکھائی۔

اس سے قبل سعد نسیم اور ظفر گوہر کی نصف سنچریوں کی بدولت سینٹرل پنجاب نے 50 اوورز میں 239 رنز بنائے تھے۔ سعد نسیم 7 چوکوں کی بدولت 84 اور ظفر گوہر 4 چوکوں اور 2 چھکوں کی مدد سے 52 رنز بناکر آؤٹ ہوئے۔ عامر جمال نے 3 جبکہ سلمان ارشاد، عماد وسیم اور زمان خان نے 2،2 کھلاڑیوں کو آؤ ٹ کیا۔

ملتان کرکٹ اسٹیڈیم میں کھیلے گئے میچ میں بلوچستان نے سدرن پنجاب کو 8 وکٹوں سے شکست دے دی۔ حسیب اللہ کی سنچری کی بدولت بلوچستان نے 192 رنز کا ہدف 27.5 اوورز میں 2 وکٹوں کے نقصان پر حاصل کرلیا۔ نوجوان اوپنر نے 82 گیندوں پر 16 چوکوں اور ایک چھکے کی مدد سے 106 رنز کی ناقابل شکست اننگز کھیلی۔ عبدالواحد بنگلزئی نے 10 چوکوں اور 2 چھکوں کی بدولت 66 رنز اسکور کیے۔

سدرن پنجاب کی ٹیم پہلے بیٹنگ کرتے ہوئے 41.3 اوورز میں 191 رنز پر ڈھیر ہوگئی تھی۔شرون سراج 67 اور محمد شہزاد 45 رنز بناکر آؤٹ ہوئے۔ عماد بٹ نے تین جبکہ کاشف بھٹی اور یاسر شاہ نے دو دو وکٹیں حاصل کیں۔

Comments

یہ بھی پڑھیں