The news is by your side.

Advertisement

شرجیل میمن کا نام ای سی ایل سے خارج کرنے کی درخواست مسترد

کراچی: سابق صوبائی وزیر شرجیل میمن کو بیرون ملک جانے کی اجازت نہ مل سکی۔ سندھ ہائیکورٹ نے ان کا نام ایگزٹ کنٹرول لسٹ سے خارج کرنے کی درخواست مسترد کردی۔

تفصیلات کے مطابق شرجیل میمن کے وکیل نے سندھ ہائیکورٹ میں درخواست کی تھی کہ شرجیل میمن کو علاج کے لیے ایک مرتبہ ملک سے باہر جانے دیا جائے۔

عدالت نے استفسار کیا کہ شرجیل میمن کتنے ریفرنسز میں نامزد ہیں۔

جواب میں نیب پراسیکیوٹر نے بتایا کہ شرجیل میمن پونے 6 ارب روپے کی کرپشن میں ملوث ہیں۔ ملزم کے خلاف مزید تفتیش جاری ہے لیکن وہ ملک سے فرار ہونا چاہتے ہیں۔

عدالت میں ایف آئی اے نے کہا کہ وہ وزارت داخلہ کے حکم کی پابند ہے۔ شرجیل میمن کا نام وزارت داخلہ کے حکم پر ای سی ایل میں شامل کیا گیا ہے۔

سندھ ہائیکورٹ نے شرجیل میمن کا نام ای سی ایل سے خارج کرنے کی درخواست مسترد کر دی۔ بعد ازاں عدالت نے کیس کی مزید سماعت اگست تک کے لیے ملتوی کردی۔

یاد رہے کہ سابق صوبائی وزیر شرجیل میمن کے خلاف پونے 6 ارب روپے کرپشن کا ریفرنس احتساب عدالت میں زیر التوا ہے۔

سندھ ہائیکورٹ میں 30 مارچ کو شرجیل میمن کرپشن کیس کی سماعت ہوئی تھی جس میں ان کی جانب سے عبوری ضمانت کی درخواست کو منظور کرلیا گیا تھا۔

مزید پڑھیں: شرجیل میمن کی عبوری ضمانت منظور

شرجیل میمن نے اس سے قبل بیرون ملک سے 2 سال بعد واپسی پر اسلام آباد ہائی کورٹ سے بھی اسی مقدمے میں حفاظتی ضمانت حاصل کی تھی۔

عدالت نے شرجیل میمن کو 20 لاکھ روپے کے مچلکے جمع کروانے کا حکم دیا تھا جبکہ ان کی حفاظتی ضمانت 2 ہفتے کے لیے منظور کی گئی تھی جس میں اب توسیع کردی گئی ہے۔


 اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
Print Friendly, PDF & Email

Comments

comments

یہ بھی پڑھیں