کراچی (5 اکتوبر 2025): سندھ کے سینئر وزیر شرجیل میمن کا کہنا ہے کہ پنجاب حکومت پاکستان پیپلز پارٹی کی آڑ میں وزیر اعظم شہباز شریف کو نشانہ بنا رہی ہے۔
سینئر صوبائی وزیر شرجیل میمن نے اہم پریس کانفرنس میں کہا کہ سیلاب سے تباہی پر پی پی اور سندھ حکومت نے پنجاب کے بھائیوں کیلیے کوششیں تیز کیں، بلاول بھٹو زرداری نے پنجاب کے سیلاب متاثرہ علاقوں کے دورے کیے لیکن پنجاب حکومت کی طرف سے پیپلز پارٹی کے خلاف من گھڑت مہم چلائی جا رہی ہے۔
شرجیل میمن نے کہا کہ پچھلے چند دنوں سے یکطرفہ مہم پنجاب حکومت کی جانب سے چلائی جا رہی ہے، اس وقت پنجاب کے لوگوں کی مدد کیلیے پورے پاکستان کو آگے آنا چاہیے، سیلابی صورتحال پر بلاول بھٹو زرداری نے وفاق اور وزیر اعظم شہباز شریف سے اپیل کی۔
یہ بھی پڑھیں: پنجاب حکومت کا بینظیر انکم سپورٹ پروگرام کے تحت متاثرین کی امداد سے انکار
انہوں نے کہا کہ موسمیاتی تبدیلی کی وجہ بننے والے ممالک اور عالمی برادری سے امداد کی اپیل بنتی ہے، وزیر اعظم شہباز شریف نے رمضان پیکج کیلیے بھی بی آئی ایس پی کا ڈیٹا استعمال کیا، بی آئی ایس پی کو پارلیمنٹ نے قانون کے ذریعے قانونی حیثیت فراہم کی، کہا جا رہا تھا کہ کوئی خوددار شخص کیسے عالمی برادری سے اپیل کر سکتا ہے، ہماری اپیلیں وفاقی حکومت سے تھیں اس کا منفی ردعمل پنجاب حکومت سے آ رہا تھا، وزیر اعظم شہباز شریف کے شکرگزار ہیں کہ عالمی برادری سے اپیل کی۔
’پنجاب حکومت پی پی کو نشانہ بنا رہی ہے مگر ان کا اصل ہدف وفاقی حکومت ہے۔ ہم وفاقی حکومت کا حصہ نہیں لیکن ان کو سپورٹ کر رہے ہیں۔ وفاقی حکومت کے خلاف پنجاب حکومت کو اس سازش میں کامیاب نہیں ہونے دیں گے۔ ایسا ماحول پیدا کرنے کی کوشش کی جا رہی ہے کہ پی پی وفاق کو سپورٹ نہ کرے، پنجاب حکومت کا وفاقی حکومت کے ساتھ حسد جیسا رویہ سمجھ سے باہر ہے۔ پیپلز پارٹی کی آڑ میں وزیر اعظم کو نشانہ بنایا جا رہا ہے۔‘
ان کا کہنا تھا کہ مشکل حالات میں سیاست نہیں کر رہے ہم پنجاب کے بھائیوں کیلیے پریشان ہیں، سیاست وہ کر رہے ہیں جو کام کم اور ٹک ٹاک پر زیادہ توجہ دے رہیں، ہم نے کبھی پنجاب کے خلاف بات نہیں ہم تو سیلاب متاثرین کی مدد کی بات کرتے ہیں لیکن وزیر اعلیٰ پنجاب مریم نواز کا اسکرپٹ رائٹر ان کو غلط راہ پر لے کر جا رہا ہے۔
شرجیل میمن نے مزید کہا کہ کہا جاتا ہے میرے پیسے میری مرضی میرا پانی میری مرضی، کوئی پڑھا لکھا شخص یا جس نے آئین پڑھا ہو کیا وہ ایسے بیان دے سکتا ہے؟ پنجاب حکومت چاہتی ہے کہ ہم ان کی پچ پر کھیلیں لیکن ہم کبھی مر کر بھی یہ نہیں کہیں گے کہ میرا کوئلہ میری مرضی میرے اسپتال میری مرضی کیونکہ یہ سب کچھ پاکستان کا ہے کسی کی کوئی مرضی نہیں۔
’ہم سب وزیر اعظم اور وزیر اعلیٰ پنجاب کی بہت عزت کرتے ہیں۔ ہم سب نے یہی کہا ہے مریم نواز ہماری بہنوں کی طرح ہے۔ کوئی ہمارا فیملی ممبر بھی غلط راستے پر ہے تو اسے سمجھانا ہمارا کام ہے۔ میری پریس کانفرنس کا مقصد کسی کو ڈی گریڈ کرنا نہیں ہے۔‘
اے آر وائی نیوز کی ڈیجیٹل ڈیسک کی جانب سے شائع کی گئی خبریں