کراچی: پیپلزپارٹی کی رہنما شرمیلا فاروقی کو اداکار حمزہ علی عباسی اور ان کی اہلیہ نیمل خاور پر تنقید کرنا مہنگا پڑ گیا۔
تفصیلات کے مطابق پیپلزپارٹی کی رہنما شرمیلا فاروقی نے سماجی رابطے کی ویب سائٹ انسٹاگرام پر حمزہ علی عباسی اور نیمل خاور کے پیرس میں ہنی مون منانے پر کہا تھا کہ شادی سادگی سے اور ہنی مون پیرس میں منایا جارہا ہے جس پر مداحوں نے انہیں آڑے ہاتھوں لے لیا۔
واضح رہے کہ چند روز قبل اداکار حمزہ علی عباسی اورنیمل خاور ہنی مون کے لیے پیرس پہنچے تھے جس کی نیمل خاور نے تصاویر اپنے سوشل میڈیا اکاؤنٹ انسٹاگرام پر شیئر کیں تاہم ان کا ہنی مون کے لیے پیرس کا انتخاب سابق رکن سندھ اسمبلی شرمیلا فاروقی کو ایک آنکھ نہیں بھایا تھا۔
سوشل میڈیا صارف نادیہ خان نے شرمیلا فاروقی کی تنقید پر جواب دیتے ہوئے کہا کہ آپ کے ساتھ مسئلہ کیا ہے، حمزہ علی عباسی جو چاہیں وہ کرسکتے ہیں۔
ایک اور صارف نے شرمیلا کے اس اقدام پر کہا کہ اللہ حمزہ علی عباسی اور نیمل خاور کو بُری نظر سے بچائے، آپ کیوں حسد کررہی ہیں، ان کی مرضی ان کا پیسہ ہے جیسے چاہیں خرچ کریں۔
یاد رہے کہ ڈرامہ اور فلم انڈسٹری کے معروف اداکار حمزہ علی عباسی اور اداکارہ نیمل خاور 25 اگست کو رشتہ ازدواج میں منسلک ہوئے تھے اور نکاح کی تقریب انتہائی سادگی سے رکھی گئی تھی، ان کے اس اقدام کو سوشل میڈیا پر خوب سراہا گیا تھا۔
