وزیر خزانہ اسحاق ڈار کے معاشی اعداد و شمار پر عمران خان کو مذاکرے کے چیلنج پر سابق وزیر خزانہ شوکت ترین کا جواب آگیا۔
شوکت ترین نے جواب میں کہا ہے کہ اسحاق ڈار عمران خان کی ٹیم چھوڑیں صرف میرے ساتھ مذاکرہ کر لیں اسحاق ڈارکی زبان مناسب نہیں تھی، اپنا اکنامک سروے دیکھ لیں۔
انہوں نے کہا کہ موجودہ حکومت نے پیٹرول اور ڈیزل کی قیمت میں 50،50 روپے اضافہ کیا سیلزٹیکس لگایا تو پیٹرول اور ڈیزل کی قیمت 100 روپے تک بڑھ سکتی ہے۔
شوکت ترین کا کہنا تھا کہ مشکل اسحاق ڈار کے چہرے پر صاف نظر آرہی ہے اسحاق ڈار مایوسی کا شکار ہےان کے چہرے سے پتہ چل رہا تھا۔
وزیر خزانہ اسحاق ڈار نے عمران خان کو براہ راست مذاکرے کا چیلنج دیتے ہوئے کہا کہ اپنے معاشی ماہرین لے آئیں اور نمبرز پر براہ راست مذاکرہ کر لیتے ہیں۔
انہوں نے عمران خان کو تنقید کا نشانہ بناتے ہوئے کہا کہ عمران خان صاحب اپنےافلاطون اکٹھے کرلیں آپ ایک نمبر بھی غلط ثابت نہیں کرسکتے۔
لیگی رہنما کا کہنا تھا کہ آڈیو لیکس آچکی ہیں، جس میں کے پی کے وزیر خزانہ کو عمران خان ہدایت دیتے ہیں کہ آئی ایم ایف کو خط لکھو اور ان کے ساتھ کسی قسم کا تعاون نہ کرو۔