کراچی: غیرسرکاری تنظیم نے کتوں کی نسل کشی روکنے کیلئے نئی درخواست دائر کردی، جس پر چیف جسٹس نے وکیل سے مکالمے میں کہا کہ کتوں نے جوعوام کاحال کر رکھا ہے وہ دیکھا ہے۔
تفصیلات کے مطابق سندھ ہائی کورٹ میں آوارہ کتوں کے کاٹنے کے واقعات کی روک تھام اور ویکسین کی عدم فراہمی سے متعلق کیس کی سماعت ہوئی۔
دوران سماعت غیرسرکاری تنظیم نےکتوں کی نسل کشی روکنےکیلئے نئی درخواست دائر کردی اور سماجی تنظیم کے وکیل نے درخواست پر نوٹس جاری کرنے کی استدعا کی۔
چیف جسٹس نے استفسار کیا آپ کون ہیں اورکس لیےدرخواست دائرکی ہے؟ جس پر وکیل نے کہا کتوں کو مارا جارہا ہے، نسل کشی روکنےکےلیےدرخواست دائر کی ہے۔
چیف جسٹس نے وکیل سے مکالمے میں کہا کہ کتوں نے جوعوام کاحال کر رکھا ہے وہ دیکھا ہے؟ جس کے بعد عدالت نے درخواست کے قابل سماعت ہونےکے متعلق آئندہ سماعت پر مزید دلائل کی ہدایت کردی۔
درخواست گزار نے کہا افسران تعاون نہیں کرتے جس کے وجہ سے مشکلات عوام کو ہوتی ہے۔
عدالت نے آوارہ کتوں کے خلاف کارروائی سے متعلق پورٹ پیش کرنےکا حکم دیا تھا اور تمام اضلاع کے ڈپٹی کمشنرز کو رپورٹ سیکرٹری بلدیات کے پاس جمع کرانے کا حکم دیا۔
عدالت کا کہنا تھا کہ ان رپورٹ کےروشنی میں سیکریٹری بلدیات پورے معاملے کو دیکھیں گے۔
