کراچی میں صفائی کی ابتر صورتحال پر سندھ حکومت عدالت میں طلب -
The news is by your side.

Advertisement

کراچی میں صفائی کی ابتر صورتحال پر سندھ حکومت عدالت میں طلب

کراچی: سندھ ہائی کورٹ میں صفائی کی ابتر صورتحال اور سالڈ ویسٹ مینجمنٹ بورڈ کے خلاف دائر درخواست کی سماعت کے دوران عدالت نے سندھ حکومت کو تفصیلی جواب دینے کا حکم جاری کردیا۔

تفصیلات کے مطابق سندھ ہائیکورٹ میں صفائی کی ابتر صورتحال اور سالڈ ویسٹ مینجمنٹ بورڈ کے خلاف ایم کیو ایم کی درخواست کی سماعت ہوئی۔

درخواست میں مؤقف اختیار کیا گیا ہے کہ سندھ کے بڑے شہروں خصوصاً کراچی میں صفائی اور کچرا اٹھانے کا نظام غیر مؤثر ہوچکا ہے۔ ٹریٹمنٹ پلانٹس نہیں ہیں، شہریوں کو صاف پانی میسر نہیں، شہر میں کچرے کے ڈھیر ہیں۔

درخواست میں کہا گیا کہ صفائی کی ابتر صورتحال سے چکن گونیا جیسی بیماریاں جنم لے رہی ہیں۔ کچرا اٹھانے کے لیے سالڈ ویسٹ مینجمنٹ بورڈ کا قیام غیر قانونی ہے۔ سالڈ ویسٹ بورڈ کو سپریم کورٹ کے حکم کے مطابق ختم کیا جائے۔

مزید پڑھیں: کراچی کی سڑکوں سے کچرا چینی اٹھائیں گے

سماعت کے دوران عدالت نے ریمارکس دیے کہ پورا سندھ کچرے کا ڈھیر بنا ہوا ہے۔ ان کی وجہ سے وبائی امراض پھیل رہے ہیں۔

ایڈوکیٹ جنرل کا کہنا تھا کہ سالڈ ویسٹ مینجمنٹ سے متعلق سماعت سپریم کورٹ میں جاری ہے اور 4 ماہ بعد اس معاملے کی سماعت ہوگی۔ سپریم کورٹ کے فیصلے میں سالڈ ویسٹ بورڈ کے حوالے سے واٹر کمیشن کی سفارشات کو بھی شامل کیا گیا ہے۔

ان کے مطابق سپریم کورٹ کا عملدر آمد کمیشن بھی اس معاملے کا باریک بینی سے جائزہ لے رہا ہے۔

عدالت نے درخواست گزار کو جواب الجواب جمع کروانے کے لیے 10 جولائی تک مہلت دے دی۔ ایم کیو ایم کے وکیل کی درخواست پر سالڈ ویسٹ مینجمنٹ بورڈ کو بھی فریق بنانے کا حکم دیا گیا۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

comments

یہ بھی پڑھیں