The news is by your side.

Advertisement

ملک میں نواز شریف کے پلیٹ لیٹس کیوں گرجاتے تھے، شہباز گل نے بتادیا

لاہور: وزیراعظم کے معاون خصوصی شہباز گل کا کہنا ہے کہ نواز شریف کو جھوٹ بول کر باہر بھاگنے میں مدد کرنے والوں کا احتساب ہوگا۔

اے آر وائی نیوز کی رپورٹ کے مطابق معاون خصوصی شہباز گل نے میڈیا سے گفتگو کرتے ہوئے کہا کہ پاکستان میں دوران علاج نواز شریف کے پلیٹ لیٹس کیوں گرجاتے تھے، مریم نواز کہتی ہیں والد کو قریب المرگ ہونے پر ملک سے جانے دیا، بتاؤں گا نواز شریف کیسے مرنے لگے تھے۔

شہباز گل نے کہا کہ بلڈ سیمپل میں کلوٹنگ روکنے کے لیے کیمیکل ای ٹی ڈی اے استعمال ہوتا ہے، ای ٹی ڈی اے کی مقدار بلڈ سے زیادہ ہو تو رپورٹ میں پلیٹ لیٹس گرجاتے ہیں، نواز شریف کے سیمپل میں ای ٹی ڈی اے کی تعداد بڑھائی گئی جس سے پلیٹ لیٹس گر گئے۔

انہوں نے کہا کہ ن لیگ نے کسی لیب سے مل کر یہ کھیل کھیلا، ای ٹی ڈی اے بڑھا دیا گیا، بلڈ کا سیمپل کم کیا گیا، رپورٹ میں بلڈ سیلز اتنے کم آئے کہ ہمارے ڈاکٹرز کو بھی لگا نواز شریف کی زندگی خطرے میں ہے۔

شہباز گل کے مطابق جھوٹی رپورٹ وزیراعظم نے دیکھی تو انسانی ہمدردی پر نواز شریف کو علاج کے لیے جانے کی اجازت دی، اب یہ تو پتا چل گیا نواز شریف جھوٹ بول کر باہر گئے۔

معاون خصوصی نے کہا کہ نواز شریف کو جھوٹ بول کر باہر بھاگنے میں مدد کرنے والوں کا احتساب ہوگا، ای ٹی ڈی اے کے معاملے کی حکومت پنجاب تحقیقات کرے گی۔

Comments

یہ بھی پڑھیں