اسلام آباد: وزیر اعظم شہباز شریف نے عزم کا اظہار کیا ہے کہ حکومتی اخراجات کو کم کریں گے اور غریب عوام کے پیسے کو مزید ضائع نہیں ہونے دوں گا۔
وزیر اعظم کی زیرِ صدارت معیشت کی ترقی سے متعلق اجلاس ہوا جس میں ملکی معیشت کی ترقی کیلیے آئندہ 5 سال کا معاشی روڈ میپ پیش کیا گیا۔ مہنگائی میں کمی، غربت کی تخفیف اور روزگار کی فراہمی بھی روڈ میپ کا حصہ ہیں۔
اجلاس میں وفاقی وزرا احسن اقبال، محمد جہانزیب، احد خان چیمہ، ڈاکٹر مصدق ملک، وزیر مملکت شزہ فاطمہ خواجہ، جہانزیب خان و دیگر نے شرکت کی۔
اجلاس میں اظہارِ خیال کرتے ہوئے شہباز شریف نے ہدایت کی کہ تمام اسٹیک ہولڈرز سے اس پلان پر عمل درآمد کیلیے مشاورت کی جائے، وقت ضائع کیے بغیر ملکی استحکام و ترقی کیلیے منصوبوں پر عمل درآمد یقینی بنایا جائے۔
وزیر اعظم نے ہدایت کی کہ ان منصوبوں کے حوالے سے عمل درآمد کا شیڈول بنا کر پیش کیا جائے، زراعت، لائیو اسٹاک اور انفارمیشن ٹیکنالوجی سے متعلق اقدامات اٹھائے جائیں، سرمایہ کاری اور صنعتوں کی ترقی کیلیے ترجیحی اقدامات اٹھائے جائیں۔
شہباز شریف نے کہا کہ آئندہ 5 برس میں ملکی معیشت کو استحکام دے کر ترقی کی راہ پر گامزن کرنا ہے، ڈیجیٹلائیزیشن اور جدت سے محصولات بڑھائیں گے، زرعی شعبے میں بھی جدت سے فی ایکٹر پیداوار بڑھائیں گے، نقصان میں چلنے والے حکومتی اداروں کی ترجیحی بنیادوں پر نجکاری کی جائے گی۔
