اسلام آباد: وزیراعلیٰ پنجاب شہبازشریف مسلم لیگ ن کے مستقل صدر منتخب ہوگئے، شہبازشریف کے مقابلے میں کسی امیدوار نے کاغذات نامزدگی جمع نہیں کرائے۔
تفصیلات کے مطابق وزیراعلیٰ پنجاب شہبازشریف نے پارٹی الیکشن کمیشن میں کاغذات نامزدگی جمع کرائے جبکہ ان کے مقابلے میں کسی بھی امیدوار نے کاغذات نامزدگی جمع نہیں کرائے جس کے بعد شہبازشریف بلامقابلہ مسلم لیگ ن کے صدر منتخب ہوگئے۔
شہبازشریف کے کاغذات نامزدگی پر چاروں صوبوں کے تجویز کنندگان اور تائید کنندگان کے دستخط موجود تھے، مسلم لیگ ن کی جانب سے مرکزی جنرل کونسل کے اجلاس میں شہبازشریف کی صدارت کا باقاعدہ اعلان کیا جائے گا۔
خیال رہے کہ سپریم کورٹ آف پاکستان کی جانب سے 21 فروری کو سابق وزیراعظم نوازشریف کو پارٹی صدارت کے لیے نا اہل قرار دیے جانے کے بعد وزیراعلیٰ پنجاب شہبازشریف کو مسلم لیگ ن کا قائم مقام صدربنایا گیا تھا۔
شہبازشریف مسلم لیگ(ن) کے بلامقابلہ قائم مقام صدر منتخب
یاد رہے کہ گزشتہ ماہ 27 فروری کو لاہور میں راجہ ظفرالحق کی قیادت میں مسلم لیگ ن کی مرکزی مجلس عاملہ کا اجلاس ہوا تھا جس میں پارٹی نے سابق وزیراعظم نوازشریف کو پارٹی کا تاحیات قائد اور وزیراعلیٰ پنجاب شہبازشریف کو قائم مقام صدر منتخب کیا تھا۔
