اسلام آباد: اپوزیشن لیڈر شہباز شریف کا کہنا ہے کہ وزیر خزانہ کی تقریر میں سچ کا فقدان ہے۔ کیا ن لیگ کا 2018 کے الیکشن تک لوڈ شیڈنگ ختم کرنے کا دعویٰ درست نہیں تھا؟
تفصیلات کے مطابق اپوزیشن لیڈر شہباز شریف نے قومی اسمبلی کے اجلاس کے دوران اظہار خیال کرتے ہوئے کہا کہ وزیر خزانہ کی تقریر میں سچ کا فقدان ہے۔ سچ اور مفروضوں کا فیصلہ ہوجائے گا۔
انہوں نے کہا کہ وزیر خزانہ نے لوڈ شیڈنگ کی بات کی لیکن کچھ بتایا نہیں، ’کیا ن لیگ کا 2018 کے الیکشن تک لوڈ شیڈنگ ختم کرنے کا دعویٰ درست نہیں تھا؟ وعدہ کیا تھا کہ 2018 تک اندھیرے ختم ہوجائیں گے یہ سچ ہے یا نہیں‘؟
شہباز شریف نے کہا کہ مسکرانا تائید ہے یا کھسیانی بلی کھمبا نوچنے کے مترادف ہے، کہا گیا تھا کہ پختونخواہ سمیت پورے ملک کو بجلی مہیا کریں گے۔ اس بیان اور اعلان پر تکیہ کرتے تو پاکستان آج اندھیروں میں ہوتا۔
انہوں نے کہا کہ پختونخواہ میں پانچ سال میں منفی 6 میگا واٹ بجلی پیدا ہوئی۔ ہم نے اپنے منصوبوں کے ذریعے 160 ارب روپے بچائے۔ ہم نے آمر کے دور میں شروع ہونے والے منصوبے بھی مکمل کروائے۔
انہوں نے مزید کہا کہ نیلم جہلم منصوبہ 18 سال میں مکمل نہ ہوا، ’وزیر خزانہ اس منصوبے کا آڈٹ کروانے کا اعلان کرتے، ایسا اعلان ہوتا تو پورا ایوان ان کی تائید کرتا‘۔
شہباز شریف نے کہا کہ پیپلز پارٹی اور ہمارے درمیان فاصلے بڑھانے کی کوشش ناکام ہوگی۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں