شہبازشریف کی درخواست منظور، فیصل واوڈا کی کامیابی کا نوٹی فکیشن رک گیا
The news is by your side.

Advertisement

شہباز شریف کی درخواست منظور، فیصل واوڈا کی کامیابی کا نوٹی فکیشن روکنے کا حکم

کراچی: مسلم لیگ ن کے صدر اور قومی اسمبلی کے حلقہ این اے 249 کے امیدوار شہباز شریف کی درخواست کو سندھ ہائی کورٹ نے منظور کرتے ہوئے تحریک انصاف کے رہنما کی کامیابی کا نوٹی فکیشن روکنے کا حکم جاری کردیا۔

تفصیلات کے مطابق مسلم لیگ ن کے  صدر اور امیدوار شہباز شریف نے کراچی  سے قومی اسمبلی کے حلقے این اے 249 سے فیصل واوڈ کے خلاف الیکشن لڑا تھا جس میں اُن کو شکست کا سامنا کرنا پڑا تھا۔

سابق وزیر اعلیٰ پنجاب کو چونکہ کم ووٹوں کے فرق سے شکست کا سامنا کرنا پڑا تھا تو انہوں نے ریٹرننگ آفیسر کو دوبارہ گنتی کی درخواست دی جسے مسترد کردیا گیا تھا بعد ازاں شہباز شریف نے الیکشن کمیشن میں درخواست دائر کی اور ساتھ ہی سندھ ہائی کورٹ میں بھی دوبارہ اپیل دائر کی۔

مزید پڑھیں: حلقہ این اے 249، شہباز شریف کی دوبارہ گنتی کی درخواست مسترد

سندھ ہائی کورٹ نے شہباز شریف کی استدعا منظور کرتے ہوئے تحریک انصاف کے امیدوار فیصل واؤڈا کی کامیابی کا نوٹی فکیشن کارروائی مکمل ہونے تک روکنے کا حکم جاری کیا۔

سندھ ہائی کورٹ میں دائر درخواست میں شہباز شریف نے مؤقف اختیار کیا تھا کہ ووٹوں کی گنتی میں بے قاعدگیاں سامنے آئیں لہذا عدالت  ووٹوں کی دوبارہ گنتی کا حکم جاری کرے۔

درخواست گزار کی جانب سے استدعا کی گئی تھی کہ عدالت الیکشن کمیشن کو حکم جاری کرے کہ حتمی نتیجے کے اعلان اور دوبارہ گنتی تک کسی امیدوار  امیدوارکی کامیابی کا نوٹی فکیشن جاری نہ کرے اور اُسے حلف اٹھانے سے روکے۔

یہ بھی پڑھیں: عمران خان کی 3 حلقوں سے کامیابی کا مشروط نوٹیفکیشن جاری

خیال رہے کہ این اے 249 سے شہبازشریف کو تحریک انصاف کے امیدوار فیصل واوڈا کے ہاتھوں شکست کا سامنا کرنا پڑا تھا۔ پی ٹی آئی کے فیصل واوڈا 35344 لے کرکامیاب قرار پائے تھے جبکہ شہبازشریف نے 34626 ووٹ حاصل کیے تھے۔

مسلم لیگ ن کے صدر نے این اے 249 میں 700 سے زائد ووٹوں کے فرق سے ہارنے پردوبارہ گنتی کی درخواست دی تھی جسے ریٹرننگ افسر نے مسترد کردیا تھا۔

Comments

comments

یہ بھی پڑھیں