site
stats
پاکستان

ساہیوال، وزیر اعلیٰ پنجاب کا بغیر پروٹوکول کے اسپتال کا دورہ

ساہیوال : وزیراعلیٰ پنجاب شہباز شریف بغیر پروٹوکول کے ساہیوال میں جھولے سے گر زخمی ہونے والے افراد کی عیادت کے لیے ڈی ایچ کیو ہسپتال پہنچ گئے۔

میڈیا رپورٹس کے مطابق وزیراعلیٰ پنجاب شہباز شریف ہیلی کاپٹر کے ذریعے ساہیوال پہنچے اور پھر ہیلی پیڈ سے کوسٹر میں بیٹھ کر بغیر پروٹوکول کے ڈی ایچ کیو ہسپتال پہنچ گئے جہاں انہوں نے جھولا گرنے سے زخمی ہونے والے بچوں کی عیادت کی۔

اس موقع پراسپتال میں موجود مریضوں اور ان کے اہل خانہ نے وزیراعلیٰ پنجاب کے سامنے شکایات کے انبار لگا دئیے، مریضوں کا کہنا تھاکہ اسپتال میں سہولیات کا فقدان ہے اور ایمرجینسی میں ناکافی انتظامات ہیں۔

وزیر اعلیٰ پنجاب نے مریضوں کی جانب سے شکایات کے انبار لگانے کے بعد اسپتال کے تمام وارڈز کا خود دورہ کیا،دورے کے دوران وارڈز کے بستروں کی بری حالت اور صفائی کے ناقص نظام پر وزیراعلیٰ خود بھی برہم ہو گئے اور اپنی خفگی کا اظہار کرتے ہوئے کہا کہ یہ اسپتال ہے یا چڑیا گھر جہاں صفائی کا انتظام نہیں۔

اس موقع پر وزیر اعلیٰ پنجاب نے اسپتال کے ایم ایس سمیت 7 ڈاکٹرز کی سرزنش کر دی۔ ان کا کہنا تھاکہ یہ ہسپتال ہے یا چڑیاگھر؟ صفائی کا کوئی نظام ہی نہیں ہے۔

وزیراعلیٰ شہباز شریف ایم ایس کے کمرے میں پہنچے تو وہاں اے سی چل رہا تھا جب کہ وارڈ میں اے سی بند تھا جس پر انہوں نے استفسار کیا کہ وارڈ کا اے سی کیوں بند ہے؟ انہوں نے اس معاملے پراسپتال کے انتظامی معاملات کی انکوائری کرنے کی ہدایت بھی کی۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top