اسلام آباد: وزیر اعظم شہباز شریف نے آذر بائیجان کے صدر الہام حیدر سے ٹیلی فونک گفتگو کے دوران 2 ملین امریکی ڈالر کے عطیے پر شکریہ ادا کیا۔
تفصیلات کے مطابق وزیر اعظم شہباز شریف نے آذر بائیجان کے صدر الہام حیدر سے ٹیلی فونک رابطہ کیا، وزیر اعظم نے آذر بائیجان کی جانب سے سیلاب متاثرین کی امداد پر شکریہ ادا کیا۔
شہباز شریف نے آذر بائیجان کی جانب سے 2 ملین امریکی ڈالر کے عطیے کا خیر مقدم کرتے ہوئے کہا کہ پاکستان شدید ترین سیلاب کی زد میں ہے، جانوں کا ضیاع ہوا، ذریعہ معاش اور انفرا اسٹرکچر کو بڑے پیمانے پر نقصان پہنچا۔
وزیر اعظم کا کہنا تھا کہ سیلاب سے متاثرہ افراد کی امداد اور نقل مکانی شدید محدود رہی، دونوں ممالک بین الاقوامی فورمز پر ایک دوسرے کی حمایت کرتے ہیں۔
انہوں نے مزید کہا کہ آذر بائیجان جموں و کشمیر پر او آئی سی رابطہ گروپ کا ایک اہم رکن ہے، دونوں ممالک کے عوام گہرے تاریخی رشتوں سے جڑے ہیں۔
