اسلام آباد: مسلم لیگ ن کے صدر اور اپوزیشن لیڈر شہباز شریف نے کہا ہے کہ رانا ثنا اللہ کو زمین پر سونے پر مجبور کیا گیا ہے، ان کے پاس نہ بیڈ ہے، نہ چارپائی اور نہ ہی کرسی ہے۔
تفصیلات کے مطابق اپوزیشن لیڈر شہباز شریف نے قومی اسمبلی میں اظہار خیال کرتے ہوئے کہا کہ عدالت میں رانا ثنا اللہ سے ملاقات کی، مشکل سے عدالت میں پہنچا اور ان سے ملاقات ہوئی، رانا ثنا کو قید تنہائی میں رکھا گیا ہے، دشمن کے ساتھ بھی ایسا سلوک نہیں کیا جاتا ہے۔
انہوں نے مطالبہ کیا کہ رانا ثنا اللہ کو چارپائی اور بستر دیا جائے، شہباز شریف کا کہنا تھا کہ رانا ثنا ایوان کے ممبر ہیں، 10 سال صوبائی وزیر قانون رہے ہیں، اپوزیشن لیڈر ہونے کے باوجود مجھے ملنے نہیں دیا جارہا تھا۔
شہباز شریف نے کہا کہ عدالت میں بھی مجھے روکنے کے لیے رکاوٹیں کھڑی کردی گئی تھیں۔
مزید پڑھیں: قومی اسمبلی میں ہنگامہ آرائی، ارکان ایک دوسرے کو مارنے کے لیے لپکتے رہے، اجلاس ملتوی
اپوزیشن لیڈر نے کہا کہ کچھ عناصر پاکستان اور علاقائی امن تباہ کرنے پر تلے ہوئے ہیں، کون سے چھپے ہاتھ ہیں جو افغانستان میں امن کو نقصان پہنچاتے ہیں، کون سے وہ دشمن ہیں جو وطن پر چھپ کر حملہ کرتے ہیں، افغانستان اور پاکستان کے درمیان امن کی کاوشیں جاری ہیں۔
شہباز شریف نے کہا کہ یہ اہم وقت ہے وزیر خارجہ اس ایوان کو اعتماد میں لیں، شہید جوانوں نے عظیم قربانیوں میں ایک اور اضافہ کیا ہے۔
انہوں نے کہا کہ جو وطن کی حفاظت کے لیے جام شہادت نوش کرتے ہیں ہمارے ہیرو ہیں، پروڈکشن آرڈر جاری نہ ہوئے تو اس ایوان کو کمزور سمجھا جائے گا۔
اپوزیشن لیڈرنے کہا کہ ڈپٹی اسپیکر بغیر ڈکٹیشن لیے ایوان کا حق ادا کریں اور جیل میں قید ارکان اسمبلی کے پروڈکشن آرڈر جاری کریں۔
