اپوزیشن لیڈر شہبازشریف کے راہداری ریمانڈ میں توسیع
The news is by your side.

Advertisement

اپوزیشن لیڈر شہبازشریف کے راہداری ریمانڈ میں توسیع

لاہور : احتساب عدالت نے قومی اسمبلی میں اپوزیشن لیڈر شہبازشریف کے راہداری ریمانڈ میں توسیع کرتے ہوئے ہدایت کی کہ قومی اسمبلی کا اجلاس ختم ہونے تک شہباز شریف راہداری ریمانڈ پر ہی رہیں گے۔

تفصیلات کے مطابق احتساب عدالت کے جج سید نجم الحسن نے ڈپٹی سپرنٹنڈنٹ کوٹ لکھپت جیل کی درخواست پر سماعت کی، جس میں بتایا گیا کہ شہباز شریف قومی اسمبلی کے اجلاس میں شرکت کے لئے اسلام آباد میں ہیں، اس لیے انہیں ریمانڈ ختم ہونے پر پیش نہیں کیا جاسکتا۔

درخواست میں استدعا کی گئی کہ شہباز شریف کے راہداری ریمانڈ میں توسیع کی جائے، احتساب عدالت نے ڈپٹی سپرنٹنڈنٹ جیل کی درخواست منظور کر لی اور ہدایت کی کہ اسمبلی کے اجلاس کے اختتام تک شہباز شریف راہداری ریمانڈ پر رہیں گے۔

احتساب عدالت نے یہ بھی ہدایت کی کہ شہباز شریف کے لاہور واپس آنے پر جیل حکام عدالت کو آگاہ کریں۔

نیب پراسیکیوٹر وارث جنجوعہ کی جانب سے بھی درخواست پر کوئی اعتراض نہیں اٹھایا گیا اور عدالت سے استدعا کی کہ راہداری ریمانڈ میں توسیع کی جائے۔

یاد رہے احتساب عدالت نے شہباز شریف کا ایک روزہ راہداری ریمانڈ دیا تھا، جو ختم ہونے کے بعد پولیس نے توسیع کی درخواست دائر کی۔

واضح رہے اپوزیشن لیڈر شہبازشریف کا ایک روزہ راہداری ریمانڈ منظور کرتے ہوئے لاہور کی احتساب عدالت نے ریمانڈ پر شہباز شریف کو اسلام آباد لے جانے کی اجازت دے دی تھی۔

جس کے بعد قومی اسمبلی کے اجلاس میں شرکت کے لئے انھیں کوٹ لکھپت جیل لاہور سے اسلام آبادپہنچا دیا گیا تھا اور اسلام آباد میں شہبازشریف کی منسٹرکالونی رہائش گاہ کوسب جیل قراردیا گیا تھا۔

Comments

comments

یہ بھی پڑھیں