کوئٹہ : وفاقی وزیر سیفران شہریار آفرید ی نے کہا ہے کہ ہم منشیات کی لعنت سے اپنے ملک اور دنیا کو محفوظ بنانے کے لئے ہراول دستے کا کردار ادا کرتے رہیں گے۔
ان خیالات کا اظہار انہوں نے کوئٹہ میں سینکڑوں ٹن منشیات نذر آتش کرنے کی تقریب سے خطاب کرتے ہوئے کیا۔ تفصیلات کے مطابق کوئٹہ کے علاقے کچ موڑ پر منشیات نذر آتش کرنے کی تقریب منعقد ہوئی۔
جس میں وفاقی وزیر سیفران شہریار آفرید ی، صوبائی وزیر داخلہ میر ضیاء اللہ لانگو، فوجی اور سول افسران کے علاوہ طلباء و طالبات نے بھی شرکت کی، تقریب میں174ٹن منشیات نذر آتش کی گئیں۔
تقریب کے مہمان خصوصی وفاقی وزیر سیفران شہریار آفریدی کا مزید کہنا تھا کہ منشیات ایک لعنت ہے اس کے خلاف مل کر کام کرنے کی ضرورت ہے اس سے کئی گھرانے متاثر ہورہے ہیں۔
اس موقع پر کمانڈر اے این ایف برگیڈئیر عاقب نظیر چوہدری کا کہنا تھا کہ اینٹی نارکوٹکس فورسز منشیات کے خاتمے کے لئے مؤثر اقدامات کررہی ہے ایک سال کے دوران ضلع قلعہ عبداللہ، دکی، جھل مگسی اور لورالائی کے مختلف علاقوں میں188ایکڑ پر کاشت پوست کی فصل کو تلف کیا گیا۔
اے این ایف حکام کے مطابق ایک سال کے دوران انٹی نارکوٹکس فورس نے مختلف کارروائی کے دوران بھاری مقدار میں منشیات برآمد کی ہے جس میں چرس ، افیون ہیروئن ، کرسٹل ، شراب شامل ہے ، جس کی قیمت عالمی مارکیٹ میں 40ارب روپے سے زائد ہے جبکہ 19ملزمان کو بھی گرفتار کرکے مقدمات درج کئے گئے ہیں۔
