The news is by your side.

Advertisement

شوگر کمیشن کی سفارشات پر کارروائی، شہزاد اکبر نے چیئرمین نیب کو خط لکھ دیا

اسلام آباد: معاون خصوصی برائے احتساب بیرسٹر شہزاد اکبر نے شوگر کمیشن کی سفارشات پر کارروائی کے لیے چیئرمین نیب کو خط لکھ دیا۔

اے آر وائی نیوز کی رپورٹ کے مطابق معاون خصوصی برائے احتساب شہزاد اکبر نے چیئرمین نیب کو لکھے گئے خط میں کہا ہے کہ چینی کی قیمتوں سے متعلق وفاقی کابینہ کے قائم کمیشن نے رپورٹ جمع کرادی ہے، شوگر انکوائری کمیشن نے 21 مئی 2020 کو اپنی رپورٹ جمع کرائی، رپورٹ وفاقی کابینہ کو بھی پیش کردی گئی ہے۔

خط کے متن کے مطابق وفاقی کابینہ نے سفارشات کا جائزہ لینے کے بعد ایکشن میٹرکس بنانے کی ہدایت کی، کمیشن کی رپورٹ کی روشنی میں ایکشن اور ریکوری کے لیے ایکشن پلان میٹرکس بنایا گیا۔

مزید پڑھیں: شوگر اسکینڈل، فوجداری قوانین کے تحت مقدمات درج ہوں گے، شہزاد اکبر

شہزاد اکبر کا کہنا تھا کہ ایکشن پلان میٹرکس کے تحت مختلف اداروں کے خلاف کرمنل تحقیقات کی جائیں، انکوائری کمیشن نے 29 ارب روپے کے خلاف قواعد سبسڈی کی نشاندہی کی۔

خط کے متن کے مطابق 29 ارب روپے کی خلاف ضابطہ سبسڈی 2014-15 میں دی گئی، انکوائری کمیشن نے لکھا شوگر مافیا نے سبسڈی کے لیے اپنا اثر و رسوخ استعمال کیا، وزیراعظم، وفاقی کابینہ نے خلاف ضابطہ سبسڈی کا معاملہ نیب کو دینے کا فیصلہ کیا، نیب اس معاملے کی جامع تحقیقات شروع کردے۔

شہزاد اکبر نے خط میں کہا کہ نیب شوگر انڈسٹری کو غیرمنصفانہ سبسڈی جاری کرنے کی تحقیقات کرے، حکومت احتساب سب کے لیے کے وژن پر کاربند ہے، حکومت نیب کو آزاد، شفاف تحقیقات کے لیے ہر طرح کی معاونت فراہم کرے گی۔

Comments

یہ بھی پڑھیں