The news is by your side.

Advertisement

شہزاد رائے اقوام متحدہ کے سفیر مقرر

کراچی: اقوام متحدہ کے ادارہ برائے منشیات و جرائم نے پاکستانی معروف گلوکار شہزاد رائے کو اپنا خیر سگالی سفیر مقرر کردیا۔

یاد رہے کہ شہزاد رائے ماضی میں رومانوی گانے گانے کے بعد اب سماجی خدمات میں مصروف ہیں جبکہ ان کے بنائے ہوئے گانے بھی معاشرتی مسائل اور خرابیوں کی طرف نشاندہی کرتے ہیں۔

انہیں ان کی سماجی خدمات کے اعتراف میں پاکستان کے اعلیٰ ترین سول اعزاز ستارہ امتیاز سے بھی نوازا جا چکا ہے۔

یو این او ڈی سی کے ڈائریکٹر نے شہزاد رائے کی تقرری کے موقع پر کہا، ’بطور گلوکار اور سماجی کارکن شہزاد رائے نے اپنے پورے کیرئیر کے دوران غیر قانونی منشیات کی روک تھام کے لیے اپنی پوری کوشش کی ہے‘۔

ان کا کہنا تھا کہ پاکستانی عوام میں بطور گلوکار اور خصوصاً نوجوانوں میں ان کی مقبولیت کے ذریعے پاکستان میں منشیات کے خاتمے کی کوششیں کی جاسکیں گی۔

اپنی تقرری پر شہزاد رائے نے خوشی کا اظہار کرتے ہوئے اسے اپنے لیے باعث فخر قرار دیا اور منشیات اور جرائم کے خاتمے کے لیے یو این او ڈی سی کے کام کی تعریف کی۔

انہوں نے کہا، ’مجھے ان بچوں کو دیکھ کر بہت افسوس ہوتا ہے جب وہ معمولی جرائم، منشیات کے استعمال یا خرید و فروخت کی وجہ سے جیل میں بند ہوتے ہیں۔ اگر میں ان بچوں میں صرف کسی ایک بچے کو بھی جیل سے نکالنے میں کامیاب رہا، اور کسی ایک نوجوان کو بھی منشیات کی لت سے چھٹکارہ دلانے میں مدد فراہم کرسکا تو مجھے فخر ہوگا کہ میں کچھ تبدیلی لے آیا‘۔

یاد رہے کہ اس سے قبل پاکستان سے معروف مصورہ اور سماجی کارکن منیبہ مزاری کو بھی اقوام متحدہ کی جانب سے خیر سگالی سفیر مقرر کیا جاچکا ہے۔

منیبہ اقوام متحدہ برائے خواتین (یو این ویمن) کی جانب سے پاکستان میں صنفی مساوات اور خواتین کی خود مختاری کے لیے کام کر رہی ہیں۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Print Friendly, PDF & Email

Comments

comments

یہ بھی پڑھیں