دبئی: پوپ فرانسس اپنے تاریخی دورے پر متحدہ عرب امارات پہنچ گئے، ایئرپورٹ پر شاندار استقبال کیا گیا۔
تفصیلات کے مطابق پوپ فرانسس اپنے پہلے اور تاریخی دورے پر دارالحکومت ابوظہبی پہنچے ہیں، پوپ فرانسس کا استقبال شیخ محمدبن زاید اور الازہر یونیورسٹی کے امام نے کیا۔
ابوظہبی کے ولی عہد شیخ محمد بن زاید نے بڑے گرم جوشی سے پوپ فرانسس کا استقبال اور ہاتھ ملایا، اس موقع پر بچوں نے پوپ کو پھولوں کا گلدستہ پیش کیا۔
سماجی رابطے کی ویب سائٹ ٹوئٹر پر اپنے بیان میں شیخ محمد بن زاید کا کہنا تھا کہ پوپ فرانسس کا دورہ متحدہ عرب امارات ہمارے کے لیے باعث خوشی ہے۔
ان کا مزید کہنا تھا کہ یہ دورہ اس لیے بھی اہم ہے کہ اس سے دیگر مذاہب کے درمیان ہم آہنگی بڑھے گی، نفرتوں کے خاتمے میں معاون ثابت ہوگا اور امن کا پیغام جائے گا۔
پوپ فرانسس کے لیے متحدہ عرب امارات کا یہ پہلا دورہ ہے، وہ مذاہب کے مابین مکالمت کی ایک تین روزہ بین الاقوامی کانفرنس میں شرکت کریں گے۔
دورے کے دوران پوپ فرانسس مصروف دن گزاریں گے اور اہم رہنماؤں سے ملاقاتیں کریں گے، وہ ابوظہبی میں ایک دعائیہ تقریب میں بھی شریک ہوں گے۔
واضح رہے کہ متحدہ عرب امارات کی 80 فیصد آبادی مسلم ہے جبکہ عیسائی مذہب سے تعلق رکھنے والے 9 فیصد ہیں، مختلف ممالک سے تعلق رکھنے والے مسیحی تارکین وطن یو اے ای میں بطور ورکر کام کررہے ہیں۔
