دبئی: متحدہ عرب امارات نے غیر ملکی سرمایہ کاری کو راغب کرنے کے لئے ایک عالمی مہم کا اجرا کردیا ہے۔
میڈیا رپورٹ کے مطابق عالمی مہم کو یونائیٹڈ گلوبل امارات کا نام دیا گیا ہے، اس مہم کے ذریعے غیر ملکی سرمایہ کاری اور قابلیت کو راغب کیا جائے گا اور متحدہ عرب امارات کو ان کیلئے دنیا کا پرکشش ، کثیر جہت ، مسابقتی اور تخلیقی کاروباری مرکز ملک ہونے کی حیثیت سے اجاگر کیا جائے گا۔
یہ مہم عالمی معیار کی صلاحیتوں ، خدمات ، انفراسٹرکچر ، قانونی فریم ورک اور وسائل کو بین الاقوامی سرمایہ کاروں ، انٹرپرینورز اور پیشہ ورانہ قابلیت کیلئے دستیاب کرے گی۔
نائب صدر و وزیراعظم اور دبئی کے حکمران شیخ محمد بن راشد المکتوم نے اس بارے میں ٹویٹ کرتے ہوئے کہا ہے کہ ہم ‘ یونائیٹڈ گلوبل امارات ‘ کے نام سے بین الاقوامی مہم شروع کررہے ہیں جس میں متحدہ عرب امارات میں ان ترغیبات اور فوائد کو اجاگر کیا جائے گا جو کہ دنیا بھر کے انٹرپرینورز کیلئے معاون ہیں، انہوں نے کہا کہ دنیا بھر سے قابلیت اور صلاحیت والوں کو یونائیٹڈ گلوبل امارات کے ذریعے اپنے خواب شرمندہ تعبیر بنانے کی دعوت دی جارہی ہے۔
We are launching “United Global Emirates”, an international campaign to highlight the benefits and incentives that the UAE offers to help entrepreneurs go global. We invite talents from all over the world to make their ideas a reality in the #United_Global_Emirates. pic.twitter.com/OX6N3kiAoB
— HH Sheikh Mohammed (@HHShkMohd) September 6, 2021
ابوظبی کے ولی عہد اور متحدہ عرب امارات کی مسلح افواج کے نائب سپریم کمانڈر شیخ محمد بن زاید النہیان نے بھی اپنے ٹویٹ پیغام میں کہا کہ اس نئی اقتصادی مہم کا مقصد متحدہ عرب امارات کو آئندہ کے پچاس برسوں میں دنیا کی مضبوط ترین معیشت کے طور پر مستحکم رکھنا ہے،
یہ مہم ایک ایسے وقت میں شروع کی گئی ہے جب متحدہ عرب امارات اپنی پیداوار ، ترقی کے نئے دور میں داخل ہورہا ہے۔
The launch of our new economic campaign aims to secure the UAE’s position as one of the strongest global economics over the next 50 years. Our nation will build on its entrepreneurial achievements to reinforce its status as a prime destination for talent, expertise & investments.
— محمد بن زايد (@MohamedBinZayed) September 6, 2021
واضح رہے کہ متحدہ عرب امارات سو ترقیاتی اشاریوں میں دنیا کے نمایاں و ممتاز ممالک میں شامل ہے، اسکے اقتصادی استحکام کے فوائد اور کاروبار کیلئے سازگار ترین ماحول ، اسکے اسٹریٹجک محل و وقوع ، مضبوط ترین مالیاتی ذخائر ، وسیع ترین خودمختار ویلتھ فنڈز اور پائیدار حکومتی اخراجات اس کو دنیا میں ممتاز مقام دلاتے ہیں۔
اسکی براہ راست پروازیں دنیا کے ڈھائی سو ممالک کو جاتی ہیں اور عالمی تجارتی نیٹ ورک میں یہ اہم کردار ادا کرتا ہے ، اسکی جہاز رانی کی لائنز دنیا کے چار سو شہروں تک پھیلی ہیں، یہاں چالیس سے زائد فری زونز ہیں جہاں مسابقتی صلاحیت اور فوائد موجود ہیں ، یہ انہیں سرمایہ کاری کیلئے موزوں ترین مقام بناتے ہیں۔
مزید اہم یہ کہ متحدہ عرب امارات میں افراد ، سرمایہ کاروں اور کارپوریٹس پر انکم ٹیکس لاگو نہیں کیا جاتا ماسوائے تیل کمپنیوں اور غیرملکی بنکوں کی شاخوں کے جبکہ کسٹم ٹیرف بھی صفر سے پانچ فیصد تک ہے۔