The news is by your side.

Advertisement

لاک ڈاؤن اپوزیشن کے بس کا روگ نہیں: شیخ رشید

اسلام آباد: وفاقی وزیر ریلوے شیخ رشید کا کہنا ہے کہ یہ اے پی سی جمعہ بازار کی بیٹھک ہے، سنڈے مارکیٹ ہے۔ لاک ڈاؤن ان کے بس کا روگ نہیں ہے۔

تفصیلات کے مطابق وفاقی وزیر ریلوے شیخ رشید نے اپوزیشن کی آل پارٹیز کانفرنس پر ردعمل کا اظہار کرتے ہوئے کہا کہ ایک بات ذہن نشین کرلیں یہ اکھٹے نہیں ہیں، شہباز کی الگ پارٹی ہے دوسروں کی الگ ہے۔

شیخ رشید کا کہنا تھا کہ تحریک چلانے کے اجزائے ترکیبی ان کے پاس نہیں ہیں، مجھے مولانا کے ساتھ بھی ہاتھ ہوتا دکھ رہا ہے۔ آصف زرداری کو 9 اسٹار کی سہولیات دستیاب ہیں۔ مہنگائی ہوئی ہے لیکن یہ ان چوروں کی وجہ سے ہوئی ہے۔

انہوں نے کہا کہ ہمارے ساتھ عوامی جذبات میں کمی آئی ہے پر یہ معاملہ صحیح ہوجائے گا۔ یہ اے پی سی جمعہ بازار کی بیٹھک ہے سنڈے مارکیٹ ہے۔ لاک ڈاؤن ان کے بس کا روگ نہیں ہے۔

وفاقی وزیر نے مزید کہا کہ عمران خان عوام کے لیے سہولتوں کے لیے کام کر رہا ہے، ریلیف ملے گا۔ کرمنل چارجز والے تحریک چلائیں گے تو جمہوریت کے خلاف سازش ہے۔ جس چیئرمین کو لانے میں اپوزیشن نے تعاون کیا اس کو بدل کے بے وقوفی کرے گی۔

خیال رہے کہ آج اسلام آباد میں متحدہ اپوزیشن کی جانب سے حکومت کے خلاف آل پارٹیز کانفرنس منعقد کی گئی جس کی صدارت مولانا فضل الرحمٰن نے کی۔

کانفرنس میں مولانا فضل الرحمٰن نے اجتماعی استعفوں اور یوم سیاہ کی تجویز دی جبکہ اپوزیشن اتحاد کے لیے نام کی تجویز، متحدہ اپوزیشن اور سیاسی رابطوں پر مشترکہ کوآرڈینیشن کمیٹی کی تشکیل بھی زیر غور آئی۔

آل پارٹیز کانفرنس میں پیپلز پارٹی، مسلم لیگ ن، اے این پی، قومی وطن پارٹی، نیشنل پارٹی اور پختونخواہ ملی عوامی پارٹی کے وفد شریک ہوئے۔

Comments

comments

یہ بھی پڑھیں