The news is by your side.

Advertisement

ساری دنیا مودی کے خلاف ہے، اب کشمیر پاکستان سے جڑے گا: شیخ رشید

آزاد کشمیر: وفاقی وزیر ریلوے شیخ رشید کا کہنا ہے کہ لال حویلی کا رشتہ سرینگر سے ہے۔ نازی مودی کے اقدام سے مسئلہ کشمیر اور اجاگر ہوا۔ ساری دنیا مودی کے خلاف ہوتی جارہی ہے، اب کشمیر پاکستان سے جڑے گا۔

تفصیلات کے مطابق وفاقی وزیر ریلوے شیخ رشید کا کہنا تھا کہ 11 ماہ تک پاکستان اور بھارت کی فوجیں آنکھوں میں آنکھیں ڈال کر کھڑی رہیں، مقبوضہ کشمیر میں 20 دن سے کرفیو لگا ہوا ہے، جہاں آج کھڑا ہوں وہاں سے کشمیر کی تحریک کا آغاز ہوا۔

شیخ رشید کا کہنا تھا کہ مقبوضہ کشمیر کو اندر سے جانتا ہوں، میرے اجداد کی قبریں وہاں ہیں۔ لال حویلی کا رشتہ سرینگر سے ہے۔ نازی مودی کے اقدام سے مسئلہ کشمیر اور اجاگر ہوا۔ ساری دنیا مودی کے خلاف ہوتی جارہی ہے، مودی نے غلطی کردی، اب کشمیر پاکستان سے جڑے گا۔

انہوں نے کہا کہ میں سرینگر کی گلی گلی اور چپے چپے سے واقف ہوں، پاکستان پر حملہ ہوا تو ہمارے پاس کوئی اور راستہ نہیں ہوگا۔ اگر حملہ ہو اتو بھارت میں مندروں میں گھنٹیاں نہیں بجیں گی، گھاس نہیں اگے گی۔

شیخ رشید کا کہنا تھا کہ جو سرینگر سے کال ہوگی وہی سردار عتیق اور عمران خان کی طرف سے ہوگی، بھارت نے حملہ کیا تو جنگ روایتی نہیں ہوگی۔ عمران خان نے کہا مذاکرات کے راستے بند ہوگئے، انہیں سلام پیش کرتا ہوں، کشمیری بہت سنجیدہ قوم ہیں، وہ فلسطین اور بوسنیا کے رہنے والے نہیں۔

انہوں نے کہا کہ سب کا فرض ہے کہ عمران خان کے ساتھ کھڑے ہوں، آئندہ 5 ماہ دنیائے سیاست میں بہت اہم ہیں۔ مسئلہ کشمیر حل ہوگا، کشمیر پاکستان کے ساتھ شامل ہوگا۔ فیصلے کا وقت آگیا تو بھارت کے ہر گھر سے نعرہ تکبیر بلند ہوگا۔

شیخ رشید کا کہنا تھا کہ سمندر پار پاکستانی پاکستان کا پرچم لے کر باہر نکلیں، خوشی ہے کہ چین چٹان کی طرح ہمارے ساتھ کھڑا ہے۔ دنیا کے کونے کونے میں جا کر کشمیر کی جدوجہد کو سلام پیش کروں گا۔ ہم پاک فوج کے ساتھ ہیں، ان کے ساتھ کندھے سے کندھا ملا کر کھڑے ہوں گے۔

Comments

comments

یہ بھی پڑھیں