The news is by your side.

Advertisement

نالہ لئی ٹھیک نہ کرتے تو آج راولپنڈی بھی ڈوبا ہوا ہوتا: شیخ رشید

اسلام آباد: وفاقی وزیر ریلوے شیخ رشید کا کہنا تھا کہ آج کراچی اور لاہور ڈوبا ہوا ہے، 2 ماہ پہلے نالہ لئی ٹھیک نہ کرتے تو راولپنڈی بھی ڈوبا ہوا ہوتا۔ نالہ لئی کے اطراف 8 منزلہ پلازے بنانے کی اجازت ہوگی۔

تفصیلات کے مطابق وفاقی وزیر ریلوے شیخ رشید کا کہنا ہے کہ ایم ایل ون کے لیے اسی ماہ ٹینڈر لگ جائیں گے، جس اسپتال میں بے نظیر بھٹو کی شہادت ہوئی اس میں ایک روپیہ نہیں لگایا گیا، ہم نے اسپتال کے لیے 40 کروڑ روپے دیے ہیں تاکہ چائلڈ وارڈ بن سکے۔

شیخ رشید کا کہنا تھا کہ راجا بازار اسپتال کو سوا ارب روپے سے نیا بنانے جا رہے ہیں، راجا بازار اسپتال کا افتتاح اسی ماہ کسی بھی دن کردیں گے۔

انہوں نے کہا کہ دنیا کی بڑی یونیورسٹیاں دیکھیں مگر اس وقت وسائل اور حالات نہیں تھے کہ پڑھ سکتا، میں وہاں مزدوری کرتا تھا اور کارپٹ کا کام کرتا تھا۔ آج اللہ کا شکر ہے میں 2 یونیورسٹیاں بنوانے جا رہا ہوں۔

وفاقی وزیر کا کہنا تھا کہ نالہ لئی کے لیے 70 ارب روپے کا منصوبہ شروع کر رہے ہیں، ایم ایل ون کے لیے عمران خان اور آرمی چیف کا مشکور ہوں، وزیر اعظم، آرمی چیف نے چین سے ہر میٹنگ پر ایم ایل ون پر زور دیا۔ ڈیڑھ سو سال بعد پاکستان کی پٹڑی بدلنے جا رہی ہے۔

انہوں نے کہا کہ چین نے بین الاقوامی یونیورسٹی بنانے میں دلچسپی کا اظہار کیا ہے، بنانے میں وقت لگے گا مگر ہم کام شروع کردیں گے۔ اس یونیورسٹی میں سندھ کی بچیوں نے بھی داخلے لیے ہیں۔ ہمارے ہاں بچیوں میں پڑھنے کا جذبہ بہت ہے۔

شیخ رشید کا کہنا تھا کہ آج کراچی اور لاہور ڈوبا ہوا ہے، 2 ماہ پہلے نالہ لئی ٹھیک نہ کرتے تو راولپنڈی بھی ڈوبا ہوا ہوتا۔ نالہ لئی کے دونوں اطراف سڑکیں بنا رہے ہیں، سڑکیں بنانے کے بعد دونوں اطراف پلازے بنا سکتے ہیں، 8 منزلہ پلازے بنانے کی اجازت ہوگی۔

انہوں نے مزید کہا کہ نیب آزاد ادارہ ہے کسی کی بھی درخواست پر انکوائری کر سکتا ہے، ریفرنس دائر ہونے تک عثمان بزدار کہیں نہیں جارہے۔ میں سمجھتا ہوں کہ ایف اے ٹی ایف میں حکومت کو شکست نہیں ہوئی البتہ اپوزیشن بے نقاب ہوئی ہے۔

Comments

یہ بھی پڑھیں