ٹرین کے ذریعے سیاحت کو فروغ دینے پر توجہ ہے: شیخ رشید -
The news is by your side.

Advertisement

ٹرین کے ذریعے سیاحت کو فروغ دینے پر توجہ ہے: شیخ رشید

لاہور: وفاقی وزیر ریلوے شیخ رشید کا کہنا ہے کہ ٹرین کے ذریعے سیاحت کو فروغ دینے پر توجہ دی ہے، فنڈز مل جائیں تو کرتار پور میں خوبصورت ریلوے اسٹیشن تعمیر کریں گے۔

تفصیلات کے مطابق وفاقی وزیر ریلوے شیخ رشید احمد نے پریس کانفرنس کرتے ہوئے کہا کہ سیاحوں کے لیے 3 ٹرینیں چلائیں گے، عوام سے دسمبر تک کا وعدہ کیا ہے۔ بغیر ٹکٹ مسافر کے ساتھ جو ملازم، اہلکار ملوث ہوا نوکری سے فارغ ہوگا۔

شیخ رشید کا کہنا تھا کہ 90 دن میں 2 ارب آمدن میں اضافہ کیا، 90 فیصد وقت کی پابندی کی جارہی ہے۔ ڈیم فنڈ کے لیے 5 کروڑ اکٹھے کر لیے ہیں، سیاحت کے لیے راولپنڈی سے ٹیکسلا تک اسٹیم انجن چلائیں گے۔ ٹرین کے ذریعے سیاحت کو فروغ دینے پر توجہ دی ہے۔

انہوں نے کہا کہ ریزوریشن اوقات بڑھانے سے ریلوے کی آمدنی 20 فیصد بڑھی، ریلوے میں ایک ارب روپے کے غیر ضروری اخراجات میں کمی کی ہے۔ بسوں کا کاروبار خراب نہیں کرنا چاہتے، مین روٹس پر آ رہے ہیں۔ 7 ڈویژنل شہروں کے اسٹیشنز پر 24 گھنٹے ریزرویشن کی جائے گی۔

وفاقی وزیر کا کہنا تھا کہ پنجہ صاحب حسن ابدال کو پشاور سے نکال کر راولپنڈی ڈویژن کے حوالے کردیا۔ سال میں 10 ارب روپے بزنس کا ہدف ہے، پورا کریں گے۔ خراب پٹریوں اور خراب بوگیوں کی مرمت شروع کر رہے ہیں۔

انہوں نے کہا کہ جتنے تالے لگوا سکتے ہیں لگوائیں گے، میں اب خود چیف جسٹس کے سامنے پیش ہوں گا۔ مال گاڑی کی تعداد 8 سے 15 کروں گا۔

شیخ رشید نے کہا کہ اگر کھلاڑی کو اناڑی کہیں گے تو تھوڑا انتظار کریں۔ لوٹا ہوا پاکستان عمران خان کو ملا ہے۔ کرتار پور کوریڈور کے افتتاح نے بھارت میں صف ماتم بچھا دی ہے، سکھ برادری آج عمران خان کو اپنا محسن سمجھ رہے ہیں۔

انہوں نے کہا کہ فنڈز مل جائیں تو کرتار پور میں خوبصورت ریلوے اسٹیشن تعمیر کریں گے، کرتار پور میں ہمارے پاس زمین موجود ہے لیز پر دینے کے لیے تیار ہیں۔ بابا گرو نانک ٹرین کے لیے بھی اقدامات کر رہے ہیں۔

Comments

comments

یہ بھی پڑھیں