اسلام آباد : سابق وزیر داخلہ شیخ رشید کا کہنا ہے کہ عمران خان مقدرکا سکندرہے، جتنےگلے تھے شہبازشریف کے گلے پڑگئے، عمران خان بات چیت کیلئے تیار لیکن پہلےالیکشن کی تاریخ دی جائے۔
تفصیلات کے مطابق سابق وزیر داخلہ شیخ رشید نے اے آر وائی نیوز سے خصوصی گفتگو کرتے ہوئے خواجہ کے جلدی انتخابات کرانے کے بیان پر کہا کہ کسی سےملاقات نہیں ہوگی، کسی سےرابطہ نہیں ہوگا، عمران خان نے کہا ہے کسی نے بات کرنی ہے تو پہلے الیکشن کااعلان کرے۔
شیخ رشید نے بتایا کہ عمران خان نےکہا بات چیت کو تیار ہوں پہلے الیکشن کی تاریخ دی جائے، نہ تمیں اور نہ مجھے کسی سے بات کرنی ہے ، الیکشن کا اعلان ہوگا تو کوئی بات ہوگی۔
سابق وفاقی وزیر نے کہا کہ پہلے یہ حکومت تحلیل کریں ، ایک دفعہ اعلان ہوگیا تو پھر لانگ مارچ ہوگا۔
ان کا کہنا تھا کہ عمران خان آرمی سےمتعلق کوئی غلط بات نہیں کی، عمران خان نےکہاکہ فوج ہی ملک میں یکجہتی کی علامت ہے، آرمی چیف تو چوتھے،پانچویں اورآٹھویں نمبر والا بھی آیا۔
شیخ رشید نے مزید کہا کہ ن لیگ نے سوچا کچھ اور تھا ہو کچھ اور گیا ہے ، یہ فیصلہ عمران خان کو راس ہوگیا ہے، گیس بجلی مہنگی کرنی ہے،مہنگائی ہونی ہے، عمران خان مقدرکا سکندرہے، جتنےگلے تھے شہبازشریف کے گلے پڑگئے۔
عمران خان کے حوالے سے پی ٹی آئی رہنما کا کہنا تھا کہ 20 سے پہلے الیکشن کی تاریخ آجاتی ہے تو عمران خان رفقا سے مشاورت کریں گے، اللہ نے ایسی فضا بنائی کہ پورا حلقہ کہتا ہے کہ عمران خان کے ساتھ کھڑے ہونا ہے، جتنی عمران خان کی پوزیشن کمزور تھی اتنی ہی مضبوط ہوگئی ہے، اب الیکشن ہوئے توپی ٹی آئی کے پاس اکثریتی ووٹ ہوگا.
انھوں نے کہا کہ نواز شریف ووٹ کو عزت کی بات کر رہا تھا اور 25 کروڑ میں ووٹ بک گیا، ووٹ کو رسوا کرکے کچرے کی ٹوکری میں پھینکا گیا۔
