اسلام آباد: وزیرمملکت برائے داخلہ شہر یار آفریدی نے کہا ہے کہ خواتین کسی بھی معاشرے میں اہم کردار ادا کرتی ہیں، ماؤں، بیٹیوں اور بہنوں کی عزت کر کے ہی اچھی قوم بنا جاسکتا ہے۔
تفصیلات کے مطابق وزیرداخلہ شہریارآفریدی نے اسلام آباد پولیس لائن میں منعقد ہونے خواتین کی تقریب میں شرکت کی خطاب کیا۔اُن کا کہنا تھا کہ خواتین کسی بھی معاشرے میں اہم کردار ادا کرتی ہیں۔
شہریار آفریدی کا کہنا تھا کہ جب بیٹیوں، ماؤں ،بہنوں کی عزت ہوگی تو تب قوم بنے گی، ترقی کیلئے خواتین کی ذمہ داری بہت اہم ہے، خواتین ماں، بہن، بیوی اور بیٹی کی شکل میں اہم کردار ادا کرتی ہیں۔
مزید پڑھیں: یوم خواتین:سینیٹ کا اجلاس آج کرشنا کماری کی سربراہی میں ہورہا ہے
وزیر داخلہ کا کہنا تھا کہ خواتین کی عزت کے بغیر ہم اچھی قوم نہیں بن سکتے، ہمیں اُن کو برابری کے حقوق دینے ہوں گے اور اُن کی عزت کرنا ہوگی۔
یاد رہے کہ دنیا بھر میں ہر سال کی طرح امسال بھی 8 مارچ کو خواتین کا عالمی دن جوش و خروش سے منایا جارہا ہے، اس ضمن میں سینیٹ کے چیئرمین صادق سنجرانی نے اجلاس کی کارروائی کا آغاز ہوتے ہی خواتین کے کردار کو سراہا اور دن کو یادگار بنانے کے لیے انہوں نے پیپلزپارٹی کی رکن کرشنا کماری کو ایک روز کے لیے اپنی نشست دے دی جس کے بعد انہوں نے اسپیکر کے فرائض انجام دیے۔
یہ بھی پڑھیں: خواتین کے عالمی دن کو ڈاکٹر عافیہ صدیقی سے منسوب کرنے کی قرارداد جمع
تھر کی تعلق رکھنے والی اور پیپلزپارٹی کی جانب سے رکن بننے والی پہلی ہندو سینیٹر نے چیئرپرسن سینیٹ کی نشست سنبھالنے کے بعد سیشن کا آغاز کرتے ہوئے کہا کہ میں دن خود کو انتہائی خوش قسمت محسوس کررہی ہوں کیونکہ جو نشست اعزازی طور پر مجھے دی گئی وہ بہت اہم ہے۔ انہوں نے کہا کہ انہیں پاکستانی ہونے پر فخر ہے اور یہی ان کی شناخت بھی ہے۔
